भांगरभूंय | प्रतिनिधी
दुबावीत ताब्यांत; कोंडवाडो दुरुस्ती परवानो प्रकरण
भांगरभूंय । प्रतिनिधी
फोंडें: कुर्टी- खांडेपार पंचायत कार्यालयांत घुसून सरपंच नावेद तहसीलदार आनी पंच बाबू च्यारी हांकां धक्काबुक्की केल्ल्या प्रकरणांत फोंडें पुलिसांनी गोपीनाथ नायक हाका ताब्यांत घेतला. खूबश्यो कागाळी आशिल्ल्यान दुबाविताक फाटल्या कांय वर्सां सावन पंचायती वतीन कोंडवाडो दुरुस्ती खातीर लागपी परवानो दिवंक नाशिल्लो. ताका लागून दुबावितान सोमारा जबरदस्तीन परवानो मेळोवपा खातीर धक्काबुक्की केली.
मेळिल्ले म्हायती प्रमाण फाटल्या 2-3 वर्सां सावन गोपीनाथ नायक हो कोंडवाडो दुरुस्ती करचे खातीर परवामो मागपा खातीर पंचायती कडेन पत्रवेव्हार करतालो. पूण कांय थळाव्या लोकांनी दुबाविता आड पंचायतींत कागाळी दाखल केल्ल्यान पंचायत मंडळ लेगीत घुस्पागोंदळांत सांपडिल्लें. पूण सोमारा सरपंच नावेद तहसीलदार आनी थळावे पंच बाबू च्यारी हे पंचायत कार्यालयांत चर्चा करतना दुबावितान कार्यालयांत घुसून दोगांकूय धक्काबुक्की केली. ह्या वेळार दुबावितान कार्यालयाचें दार बंद केल्लें. धक्काबुक्की जाल्ल्याची पुलीस कागाळ दिले उपरांत फोंडें पुलिसांनी दुबावीत गोपीनाथ नायक हाका ताब्यांत घेतलो.
पत्रकारां कडेन उलयतना सरपंच तहसीलदार हांणी सांगलें, फाटल्या कांय वर्सांचो प्रलंबीत प्रस्न सोडोवचे खातीर नायक कुटुंबियांक कायदेशीप कागदपत्रां सादर करपाची विनवणी केल्ली. परवानो दिवपाचें काम पंचायत सचिवाचें आसा, पूण सोमारा सकाळीं आपल्या कार्यालयांत येवन दुबावितान धक्काबुक्की केली. ताका लागून पुलिशेक आपोवन रितसर कागाळ केली.
ह्या वेळार सरपंच तहसीलदार हांचे वांगडा पंच बाबू च्यारी, नीळकंठ नायक, भिका केरकार आनी अभिजीत गावडे हाजीर आशिल्ले.
फाटल्या कांय वर्सां सावन अन्यायः प्रेमानंद नायक
थळावी पंचायत फाटल्या कांय वर्सां सावन अन्याय करता. पावसाळ्यांत आयिल्ल्या वाऱ्यांत कोंडवाड्याचेर झाड पडून लुकसाण जाल्लें. ते उपरांत पंचायतीन कोंडवाडो दुरुस्ती करचे खातीर लुकसाण भरपाय दिल्ली. पूण कोंडवाड्याची दुरुस्ती करून घेवचे खातीर परवानगी दिनात. परवान्या खातीर लागपी सुमार 11 विवीध तरेचीं कागदपत्रां पंचायतीक सादर केलीं, पूण दर खेपे तातूंत चुको काडून परवानगी दिवपाक न्हयकार दिलो, अशें दुबाविताचो भाव प्रेमानंद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
