भांगरभूंय | प्रतिनिधी
फोंडें: कुर्टी-खांडेपारचे ग्रामसभेंत मुर्डी आनी ओपाचे मसंडभूंयेच्या प्रस्नाचेर चर्चा रंगली. अनुसुचीत जमाती आयोगान ह्यान पयलींय विवीध सुवातांची पळोवणी केल्या. हाका लागून ग्रामस्थांनी योग्य सुवात दाखोवची. हे खातीर सगळ्यांनी एकठांय येवन, बसका घेवन हाचेर तोडगो काडपाचो उलो सरपंच अभिजीत गावडे हांणी ग्रामसभेंत ग्रामस्थांक मारलो.
सरपंच अभिजीत गावडे हांचे अध्यक्षतेखाला जाल्ले ग्रामसभेंत पंचायत सचीव सचिन नायक, गट विकास कार्यालयाचे अधिकारी नितेश पालेंकार, पंच वांगडी आनी हेर ग्रामस्थ व्हडा संख्येन हजर आशिल्ले.
खांडेपारच्या ओपा वाठारांतल्या गांवच्या लोकांक मसंडभूंय ना. ह्या गांवच्या कोणाकूय मरण आयल्यार तांचे निमाणे संस्कार रान खात्याचे सुवातेर करचे पडटात. दोन वर्सां आदीं निमाण्या संस्कारां वेळार सुवाते खातीर विरोध जाल्ल्यान अनुसूचीत जमातीच्या लोकांनी आयोगाकडेन दाद मागिल्ली. ते प्रमाण अनुसुचीत जमाती आयोग आनी थळावे पंचायती वतीन सुवातेची पळोवणी केली. मात योग्य सुवात मेळूंक नाशिल्ल्यान मसंडभूंय उबारपाचें काम आडकून उरिल्लें. आयतारा जाल्ले ग्रामसभेंत ग्रामस्थांनी मसंडभूंय उबारपाची मागणी केली. सरपंच अभिजीत गावडे हांणी मसंडभूंय उबारपा खातीर ग्रामस्थांनी एकठांय येवन, चर्चा करून, योग्य सुवात दाखोवन दिवपाचो उलो मारलो. उपरांत थाराव दितले अशें स्पश्ट केलें.
कुर्टी -खांडेपारा अडेज वर्सां आदीं जाल्ले ग्रामसभेंत ग्रामविकास समितीची निवड केल्ली. मात समितीच्या निमंत्रकपदार दोन नांवां दाखल जाल्ल्यान हो निर्णय पंचायत मंडळांनी घेवपाचो थाराव त्या वेळार घेतिल्लो. आयतारा जाल्ले ग्रामसभेंत ग्रामविकास समितीच्या निमंत्रकांची निवड जावंक नाशिल्ल्याचें ग्रामस्थांनी दाखोवन दिलें. तेन्ना सरपंच अभिजीत गावडे आनी पंच वांगडी भिका केरकर हांणी अडेज वर्सां आनीं जाल्ले ग्रामसभेंत निमंत्रक निवडीचो निर्णय पंचायत मंडळांनी घेवपाचो थाराव दिल्लो अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
