भांगरभूंय | प्रतिनिधी
भांगरभूंय । प्रतिनिधी
पोरणे गोंयः काँग्रेस पक्षाचे तिकेटीचेर वेंचून येवंन भाजपांत गेल्ल्या कुमारजुवेंचो आमदार राजेश फळदेसाय हाचेर काँग्रेस फुडाऱ्यांनी कुमारजुवें मतदारसंघांतल्या मंगळारच्या ‘हाथ से हाथ जोडो’ वेळार खऱ टिका केली. धोल बडोवन फळदेसाय भाजपांत गेल्लो. मात ताच्या पदरांत अजून व्हडलेशें कांय पडूंक ना. फुडले वेंचणुकेंत कुमारजुवेंतलो लोक ताचो धोल करून ताका घरा धाडटले अशें विरोधी पक्ष फुडार युरी आलेमांव हांणे सांगलें.
आपूण काँग्रेस पक्ष सोडचो ना अशें आवचो सोपून घेवन सांगपी राजेश फळदेसायान आप सुवार्था खातीर आवयचो लेगीत मान राखलो ना अशें प्रदेश काँग्रेस अध्यक्ष अमीत पाटकारान सांगलें. काँग्रेसच्या मतदारानी तुका वेंचून दिलां, भाजपाच्या न्हंय हें हांव राजेश फळदेसाय हाका सांगपाक सोदतां. भाजपांत वचून तुवें 6786 मतदारांचो अपमान केला. फुडले वेंचणुकेत तुका ते दारांत लेगीत उभे करचे नात हे मतींत दवोर अशें पाटकारान ताका सांगलां.
भाजपात गेल्ल्यान आपूण व्हडलो जालो अशें दिसता जाल्यार राजेश फळदेसायान आमदारकीचो राजिनामो दिवंन परत वेचून येवन दाखोवचें अशें आव्हान ताका काँग्रेस पक्षाचे मीडिया मुखेली अमरनाथ पणजीकारान दिला. काँग्रेस फुडाऱ्यांनी भाजपा सरकाराचे सगल्या मळार आयिल्ल्या अपेसा खातीर टिका केली. बेरोजगारी, म्हारगाय, भ्रश्टाचार, सरकारी नोकऱ्यो विकप, पणजी स्मार्ट सिटींतलो भ्रश्टाचार हाचे वयल्यान तांणी डॉ सावंत सरकाराक धारेर धरलें.
कार्यावळी वेळार कुमारजुवें काँग्रेस गट समिती वतीन विरोधी पक्ष फुडारी युरी आलेमांव आनी आमदार अॅड कार्लोस फेरेरा हांचो भोवमान केलो. कार्यावळींत काँग्रेस बायल मोर्चा अध्यक्ष बीना नायक, विजय भिके, वरद म्हार्दोळकार, विशाल वळवयकार हांची भाशणा जाली.
काँग्रेसाक मत म्हणल्यार भाजपाक मत अशें सांगपी तृणमूल काँग्रेसाचो खासदार डॅरेक ऑब्रियन हाचो अमीत पाटकार हांणे समाचार घेतलो. तांगेलो वेंचणूक युतींतलो भागिदार मगो पक्ष सध्या भाजपा सरकारांत आसा हें ताणे मतींत दवोरचें अशें पाटकार हाणे सांगलां. काँग्रेसा विशीं उलयतना ऑब्रियन हांणी भाजपा सरकाराचो एक वांटो जाल्ल्या मगो कडेन उलोवचें अशें तांणे तृणमूलाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
