भांगरभूंय | प्रतिनिधी
-मुख्यमंत्री डॉ.प्रमोद सावंत हांचो हस्तक्षेपपणजीः शिक्षक दिसा विद्यार्थ्यांक न्याय मागपा खातीर आंदोलन करपाची पाळी आयली. कुमारजुंवेंचे सरकारी मुळावे शाळेच्या मुख्याध्यापिकेची अचकींत बदली केल्या, असो दावो करून ती रद्द करपाची मागणी करून पणजेच्या आझाद मैदानाचेर पालकांनी विद्यार्थ्यां सयत धरणें आंदोलन केले. हाचेर जाप दितना मुख्यमंत्र्यांनी सांगलें, विद्यार्थ्यांक आझाद मैदानाचेर हाडप चुकीचे, तिची बदली रद्द जावपाक शकता.
मजगतीं, कुमारजुंवें शाळेच्या शिक्षिका बदली प्रकरणांत मुख्यमंत्र्यांनी हस्तक्षेप करून कुमारजुवेंतल्या सरकारी मुळावे शाळेची मुख्याध्यापिका मंगला गावडे हांची बदली शिक्षण खात्या कडल्यान रद्द केला.
कुमाजुंवेंतल्या मुळावे सरकारी शाळेतली मुख्याध्यापिका मंगला गावडे हांची अचकींत बदली जाल्ल्यान पालक खुबळ्ळे आनी आपल्या भुरग्यांक घेवन आझाद मैदानाचेर आंदोलनाक बसले. हॅप्पी टिचर्स डे टू मंगला गावडे. आमची शिक्षिका आमकां जाय अश्यो घोशणा माणकुल्या भुरग्यांनी ह्या वेळार दिल्यो.
शिक्षिकेची बदली करपाचे कारण आमकां सांगूंक ना, पूण शाळेंत स्मार्ट एलईडी स्क्रिन कोणीतरी भेट दिल्या. ह्या कारणांक लागून तिची बदली करपा फाटल्यान थळाव्या आमदारांचो हाचे हात आसपाक शकता, असो दुबाव पालकांनी उक्तायला.
शिक्षिकेची अचकींत बदली करपा फाटल्यान आमकां कारणां कितें ते खबर ना. पूण जेन्ना आमी शिक्षण खात्याचे कचेरेत गेल्ले तेन्ना थळावे आमदार राजेश फळदेसाय हांणी तिची बदली केल्या अशें आमकां अधिकाऱ्यांनी सांगलें, अशी म्हायती एका पालकान दिली.
आमचे शाळेक कोणेतरी एलईडी स्मार्ट स्क्रिन भेट दिल्या. ती स्विकारली म्हूण तिची बदली जाल्या अासुये असो दुबाव आमकां आसा. भुरग्यांक आमकां आंदोलनाक हाडपाक बरे दिसना. पूण आमची मागणी पुराय करपा खातीर आमचे कडेन दुसरो पर्याय ना, अशे एका पालकान सांगलें.
मंगला गावडे हांकां व्हॉटसअॅपाचेर एस मॅसेज आयलो, तिची बदली जाला म्हूण सांगलें. नोटीस बीं कांय धाडूंक ना. गावडे ही मराठी शिक्षिका, पूण तिचे सुवातेर इंग्लीश शिकोवपी शिक्षिका धाडल्या. शाळेंत दोन इंग्लीश शिकोवपी शिक्षिका आसात आनी मराठी विशयाची शिक्षिका ना, अशें दुसऱ्या एका पालकान सांगलें.
उपरांत विरोधी पक्ष फुडारी युरी आलेमांव, काँग्रेसीचे गोंय प्रदेशाध्यक्ष अमीत पाटकार आनी हेर फुडाऱ्यांनी पालक आनी विद्यार्थ्यांची भेट घेवन तांच्यो समस्या जाणून घेतल्यो.
———-
शिक्षण खात्याचे संचालक शैलेश झिंगडे हांकां हे विशीं विचारल्यार, तांणी हे घडणुकेचेर दुख्ख उक्तायलें. खंयच्याय शिक्षकाची बदली करपाचो अधिकार शिक्षण खात्याक आसा. कुमारजुंवेंचे सरकारी मुळावे शाळेंतल्या विद्यार्थ्यांचो मोर्चा खातीर वापर करप ही गजाल दुर्दैवी आसा. बदली जाल्ल्या शिक्षिकेक राजकी तेंको आशिल्ल्याची शक्यताय आसपाक शकता आनी तिणें आपली चूक मान्य करची.
-शैलेश झिंगडे, शिक्षण संचालक
————-
मुख्यमंत्री डॉ. प्रमोद सावंत हांणी हे घडणुकेचेर तिडक उक्तावन सामाजीक वावुरप्यांक दोश दिला. स्वताचो उद्देश पुराय करून घेवपा खातीर सामाजीक वावुरप्यां कडल्यान विद्यार्थ्यांचा वापर करप चुकीचे. विद्यार्थ्यांक आझाद मैदानावर हाडप ही गजाल सोंसपा भायर आसा. मुख्याध्यापिकेची बदली रद्द जावपाक शकता.
-डॉ. प्रमोद सावंत, मुख्यमंत्री
——————-
ह्या प्रकरणात म्हजो हात नाः आमदाराचें स्पश्टीकरण
कुमारजुंवेंचे मुळावे शाळेची मुख्याध्यापिका मंगला गावडे हांची बदली करपा फाटल्यान म्हजो हात ना, अशें स्पश्टीकरण थळावे आमदार राजेश फळदेसाय हांणी दिला. शिक्षकांची बदली विशींचो निर्णय शिक्षण मंत्री आनी शिक्षण संचालनालय घेता. देखून कुमारजुंवेंचे मुळावे शाळेचे मुख्याध्यापिकेची बदली करपा फाटल्यान म्हजो कसलोच हात ना. बदली विशया वयल्यान म्हज्या म्हऱ्यान कोणूच येवंक ना. देखून म्हजो ह्या प्रकरणा कडेन कसलोच संबद ना, अशें आमदार राजेश फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
