भांगरभूंय | प्रतिनिधी
तरणाटे आनी बार्जी वयल्या तारवट्यान दाखयली शिटुकसाण
भांगरभूंय । प्रतिनिधी
पणजीः चोडणा फेरीबोट बुडपाची घडणूक ताजी आसतना कुमाररजुंव्यार न्हंये मदेगाद फेरीबोटीच्या इंजिंनात इबाड जावन ती बंद पडली. हे मजगतीं तेन्नाच बार्ज हे न्हंयेंतल्यान वताली. पूण वेळ बरो म्हूण बार्जी वयल्या तारवटीचे शिटुकसाणेक आनी न्हंयेदेगेर आशिल्ल्या तरणाट्यांक लागून व्हड अनर्थ टळ्ळो.
चोडणां बुडिल्ली फेरीबोट अजून भायर काडपाचें काम चालू आसा. विरोधक आनी थळावे लोक न्हंय येरादारी खात्याच्या कारभाराचेर बोट दवरपाक लागल्यात. हो विशय चालू आसतना कुमारजुंवें फेरीबोट बंद पडून व्हड दुर्घटणा जावपाची टळ्ळी.
न्हंय येरादारी खात्याच्या गोपांनी दिल्ले म्हायती प्रमाण, ही फेरीबोट कुमारजुंवें कानालांत धावजी फेरी धको ते तोल्टो फेरी धक्या मेरेन यो-वच करता. दनपारां सुमार 3.30 वरांचेर ही फेरीबोट तोल्टो धक्या वयल्यान सुटली आनी न्हंये मदेगाद पावतक इंजिनांत इबाड जावन ती बंद पडली.
इंजीन परत सुरू जावंक नाशिल्ल्यान आनी न्हंयेच्या उदकाक नेट आशिल्ल्यान ही फेरीबोट मदेगाद आडकून उरली. हे मजगतीं मांडवी न्हंयेंतल्यान बार्ज कुमारजुंवें कानालांत भितर सरली आनी खूब नेटान फुडें वताली. तोल्टो फेरीबोट धक्याचे कुशीक नुस्तें गरोवपी कांय तरणाट्या मुखार ही घडणूक घडिल्ली. गतीन येवपी बार्ज तांणी पळयली आनी आड्डी मारीत तांणी बार्जी वयल्या कर्मचाऱ्यांक शिटकायले.
बार्जी वयल्या तारवट्यान तरणाट्यांचो सिग्नल मेळटकत बार्जीचो वेग उणो केलो. पूण फेरीबोट मदेगात आशिल्ल्यान बार्ज नियंत्रणांत हाडप कठीण आसलें. बार्जी वयल्या तारवट्यान आपलो अणभव वापरून बार्ज कशे भशेन कुशीक व्हेली, तरी लेगीत ती फेरीबोटीक तेंकून गेली. फेरीबोट आनी बार्ज हांचे मदीं सुमार एका इंचाचें अंतर आशिल्लें. तरी लेगीत बार्ज धनयान शिटुकणसाणेन बार्ज न्हंयेदेगेक वचून फेरीबोटीक लुकसाण करिनासतना कांदळी मोडीत भायर सरली.
उपरांत हे विशींची अधिक म्हायती दितना न्हंय येरादारी खात्याच्या गोपांनी सांगलें, फेरीबोट कर्मचाऱ्यांनी ही म्हायती पणजे ट्राफीक कन्ट्रोलराक दिल्या.
ट्राफीक कन्ट्रोलराक दिल्ले म्हायतींत तांणी म्हणलां, फेरीबोटींत 4 ते 5 लोक आनी एक दुचाकी आशिल्ली. फेरीबोट बंद पडले उपरांत लोकांचो बोवाळ सुरू जालो आनी बार्ज येतकत लोकांच्यो हुयेली सुरू जाल्यो. उपरांत धोको गेले उपरांत कर्मचाऱ्यांनी इंजन रुमांत वचून इंजीन दुरुस्त केलें आनी फेरीबोट सुरू करून धक्यार लायली. ते उपरांत ही फेरीबोट बंद करून धक्या कुशिकूच नांगरून दवरली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
