भांगरभूंय | प्रतिनिधी
भांगरभूंय । प्रतिनिधी
माशेलः कुमाजुवेंचो आमदार आनी राज्य पुनर्वसणूक म्हामंडळाचो अध्यक्ष राजेश फळदेसाय हाणे आपल्या मतदारसंघांतल्या सात पंचायत वाठारांतल्या कोयराची येरादारी करपा खातीर 4 रिक्शा विकत्यो घेतल्यात. सातून पंचायत वाठारांत दिसपट्ट्यो फेरयो मारून त्यो कोयर उखलून हाडटल्यो. मुख्यमंत्री डॉ प्रमोद सावंत हाचे हस्तुकीं पोरण्या गोंयांत ह्या रिक्शाचें उक्तावण जालें.
मतदारसघात दरेका सुवातेर सीसीटीव्ही बसोवप शक्य ना. लोकांक कितलेंय सांगलें तरी रस्त्या कुशीक प्लास्टिक आनी हेर कोयर हाडून उडयतात. रस्त्यार तयार जाल्ल्यो कोयराच्यो राशी बऱ्यो दिसनात. ताका लागून व्हो कोयर व्हरपा खातीर रिक्शांची वेवस्था केल्या अशें फळदेसायान सांगलें. मतदारसंघातल्या पंचायतीं वतीन घरांनी वचून कोयर एकठांय करपाचें काम चल्लां. मात लोक सकाळी वा रातयां रस्त्या कुशीक कोयर हाडून उडयाता. तो रोखडोच काडपाची गरज आसता. दरेकी रिक्शांत ड्रायव्हर आनी दोन कामगार अश्या 12 जाणांक कामार घेतलां अशें फळदेसायान सांगलें.
शेनवारा फळदेसाय हाच्या ह्या उपक्रमाचें मुख्यमंत्र्यांचे हस्तुकी उक्तावण केले. फळदेसाय हाणे स्वता खर्च करून सुरू केल्ले नितळसाण मोहिमेचें तांणे तोखणाय केली. आमदारांक लोकांचो वांगोड मेळ्ळ्यार कुमारजुवें मतदारसंघ सोबीत आनी नितळ जावपाक वेळ लागचो ना अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
