भांगरभूंय | प्रतिनिधी
मंत्री मॉवीन गुदिन्हो, आमदार प्रेमेंद्र शेट हांची हाजेरी
भांगरभूंय । प्रतिनिधी
माशेल : कुमारजुंवें सांगोड उत्सव हो आमच्या सनातन संस्कृतीचें आंग. थळावे लोक व्हड उमेदीन शांतादुर्गा देवीच्या चवथी निमतान सात दिसांचो गणपती पावयतना हो उमेदीचो उत्सव ह्या वाठारांत मनयतात. तो प्रत्यक्ष पळोवपाचो योग म्हाका मेळ्ळो, हें हांव म्हजें भाग्य समजता. अशे तरेची संस्कृती सांबाळपाचो वावर लोकां वांगडा आमचें सरकार तांकां सगले तरेची मजत करून करता. पूण थळाव्या आमदारान हो भार स्वताच्या भुजार घेवन ते अर्थीक मजत करतात, ही तोखणायेची गजाल, अशें पंचायत मंत्री मॉवीन गुदिन्हो हांणी सांगलें.
कुमारजुंव्यां श्री शांतागुर्गा देवीचो सात दिसांचो गणपती पावयतना सांगोड उत्सवा वेळार पंचायती वतीन आयोजीत सांगोड देखावो सर्तीच्या इनामां भेटवण सुवाळ्यांत गुदिन्हो मुखेल सोयरे म्हूण उलयताले.
ह्या वेळार निमंत्रीत सोयरे म्हूण मयेंचे आमदार प्रेमेंद्र शेट, डेक्कम फायन कॅमिकल खोर्लीचे सीएसआर वेवस्थापक गौरव कुडचडकार, कुमारजुंवेचे आमदार राजेश फळदेसाय, उजो पालोवपी दळाचे संचालक नितीन रायकार, पर्यटन खात्याचे संचालक केदार नायक, श्री शांतादुर्गा कुमारजुंवेंकान्न देवस्थानाचे अध्यक्ष डॉ. शिवाजी शेट, थळावे सरपंच सचीन गावडे, श्रीराम देवस्थानाचे अध्यक्ष चंद्रशेखर फडते, उपसरपंच सुधीर फडते आनी हेर पंचायत मंडळ हाजीर आशिल्ले.
सरपंच सचिन गावडे, सुधीर फडते, नंदकुमार शेट, विक्रम परब, अनुज नायक, विंदा जोशी, अर्चना परब, शेजल नार्वेकार, प्रशांत नार्वेकार, साक्षी तारी, सुर्यकांत गावडे, प्रशांत जोशी हांणी सोयऱ्यांक फुलांतुरे भेटयले.
प्रेमेंद्र शेट हांणी सांगलें, हो उत्सव व्हड करपाक आमदारान व्हड योगदान दिलां. अश्या कार्यावळींनी हाजेरी लावन आमी सगळे आमदार एकवटींत आसात हें दाखयतात.
मुख्यमंत्री डॉ. प्रमोद सावंत आनी पर्यटन मंत्री रोहन खंवटे गोंया भायर गेल्ल्यान आयत्या वेळार आपणे मंत्री गुदिन्हो आनी आमदार शेट हांकां आमंत्रण दिलें. तांणी हें आमंत्रण स्विकारिल्ले खातीर तांचे उपकार मानतां. आपल्या उल्याक देवी पावली हे खातीर आपणे भांगराचो मुकूट भेटयला. हाचे मुखार हो उत्सव आपूण आगळो वेगळो करतलों, अशें आमदार राजेश फळदेसाय हांणी सांगलें. ह्या वेळार डॉ. शिवोजी शेट, गौरव कुडचडकार हांचीं उलोवपां जालीं. तशेंच ह्या वेळार माचये वयल्या मानेस्तांक यादस्तीक चिन्न भेटयलें. मानेस्तां हस्तुकीं जैतवंतांक इनामां भेटयलीं. पुरुषोत्तम सावंत हांणी सुत्रसंचालन केलें. सरपंच सचिन गावडे हांणी प्रास्तावीक केलें. सूर्यकांत गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
