भांगरभूंय | प्रतिनिधी
भांगरभूंय । प्रतिनिधी
फोंडेंः फोंडेच्या उपजिल्हो हॉस्पिटलांत (पयलीचें आयडी हॉस्पिटल) 2023 वर्सा कुत्र्यांनी घास मारिल्ल्या 1217 जाणांचेर उपचार केले.पोरूं मे म्हयन्यांत 163 जाणांक कुत्र्यांनी घास मारले. रस्त्याद कुत्र्यांचो आंकडो वाडत आशिल्ल्यान तशेंच उपचार करपाक येवपी लोकांचो आंकडो वाडत आशिल्ल्यान कुत्र्यांचो बंदोबस्त करपाची मागणी साबार लोक करपाक लागल्यात.
फोंडें उपजिल्हो हॉस्पिटलांत पोरूं जानेवारी म्हयन्यांत 114, फेब्रुवारीत 130, मार्चांत 130, एप्रिलांत 125, मे म्हयन्यांत 163, जूनांत 84, जुलयांत 53, ऑगस्टांत 75, सप्टेंबरांत 80, ऑक्टोबरांत 67, नोव्हेंबरांत 84 आनी डिसेंबर म्हयन्यांत 94 जाणांचेर उपचार केले, सरासरी म्हयन्याक 101 लोकांचेर उपचार केल्ल्याचें दिसून आयलें. फोंडें, धारबांदोडें, तिसवाडी, दिवचल, सत्तरी, साश्ट, केंपें आनी सांगें तालुक्यांतले हे कुत्र्यांनी घास मारिल्ले लोक आसात. सगल्यात चड लोक फोंडें तालुक्यांतले आशिल्ले. कुर्टी, बेतोडें, हवेली, बोरये, कवळें, बायथाखोल, ढवळी, वेलिंग- प्रियोळ आनी फोडें पालिका वाठारांत रस्त्याद कुत्र्यांचो आकडो बरोच वाडला.
हे कुत्रे रस्त्यान वचपी वाहनांचेर चड करून दुचाकी फाटल्यान लागतात. ताका लागून जायते जाण दुचाकी वयल्यान पडून अपघात जाल्यात. फोंडें तालुक्यांतल्या हायस्कुलां कडेन कुत्र्यांचो वावोर वाडपाक लागला. ताका लागून विद्यार्थ्यांक ताचे पसून धोको तयार जाला. फोंडें वाठरांत कांय सुवातांनी कोयर उडोवपाच्या प्रकारांक लागून थंय व्हडा प्रमाणांत कुत्रीं जमतात. तिस्क- उसगांव हांगाय हेंच चित्र दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
