भांगरभूंय | प्रतिनिधी
अंकोला- शिरुरू कोसळिल्लें पालसण
कारवार: अंकोला- शिरुरू पालसण कोसळिल्ल्याचे घडणुकेक दोन म्हयने जावन गेले. तरी लेगीत अजून तीन कुडी आनी एका ट्रकाचो सोद लागलो ना. आतां परतून गंगावळी न्हंयेंत सोद मोहीम सुरू केल्या. ते खातीर गोंयच्यान ड्रेजर मशीन आनी बार्जीची मजत घेतल्या.
कारवार अंकोला मतदारसंघाचे आमदार सतीश सैल हांच्या फुडारपणा खाला ही सोदमोहीम काल सावन सुरू केल्या. पालसण कोसळ्ळें तेन्ना दोंगराची माती रस्त्या कुशीक आशिल्ल्या गंगावळी न्हंयेंत कोसळ्ळी. तातूंत गंगावळी न्हंयेंत जुंवो तयार जालो आसून त्या जुंव्यार तीन कुडी आनी एक ट्रक आसपाची शक्यताय आसा. ते खातीर बार्ज आनी डे्रजर मशिनाच्या आदारान न्हंयेंतली माती काडून सोद घेतात.
हे दुर्घटणेंत धा जाणांक मरण आयिल्ल्याची नोंद आसून अजून तीन कुडी सांपडूंक नात. जोयडा म्हालांतल्या जगलबेट हांगा सावन लांकूड भरून गेल्लो केरळांतलो ट्रक आनी चालक हेवूय बेपत्ता आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
