कुडींक जीवनसत्व सी जाय जाल्यार….

भांगरभूंय | प्रतिनिधी

जीवनसत्व सी कुडी खातीर खूब म्हत्वाचें पोशक तत्व. ताची उणीव आसल्यार भलायकेच्यो जायत्यो समस्या निर्माण जावंक शकतात. जीवनसत्व सी एक गरजेचें पोशक तत्व आसून तें घटमूट रोगप्रतिकार शक्त तयार करपाक, कात बरी दवरपाक आनी घावें बेगीन बरे करपाक मजत करता. थकवा आनी दुबळेपण, थंडी आनी खोंकली येवप, सांदे दुखप आनी सुज येवप, केंस गळप, रोगप्रतिकार शक्त उणी जावप, भूक लागप ना ही जीवनसत्व सी उणावाचीं लक्षणां. जीवनसत्व सी उणावाक लागून स्कर्व्ही, हाडां दुबळीं, रोगप्रतिकार शक्त दुबळी जावंक शकता आनी तुमचे कातीचे आनी केंसांचे भलायकेचेरय परिणाम जावं येता.

पोशणतज्ञ आनी आहारतज्ञ शिखा अग्रवाल शर्मा हांच्या मतान चडशे लोक लिंबूक जीवनस्तव सीचो बरो स्त्रोत मानतात. तातूंत 100 ग्रामांत सुमार 53 मिलीग्राम जीवनसत्व सी आसता. पूण लिंबू परस चड जीवनसत्व सी आशिल्ली आजून कांय फळां आसात.

पपय – पपयांत सुमार 60 मिलीग्राम/100 ग्रॅम जीवनसत्व सी आसता. लिंबापरस पपयांत चड जीवनसत्व सी आसता. हाका लागून घावे बरे करपाक, कोलेजन तयार करपाक आनी कुडीची ऑक्सिडेटिव्ह ताणांतल्यान राखण करपाक मजत करता. तशींच ती पचना खातीरुय बरी.

जांबूळ – हातूंत सुमार 181 मिलीग्राम/100 ग्रॅम जीवनसत्व सी आसता. हाची आंबट रूच आसता आनी तातूंत पोशण गुणधर्म भरपूर आसतात. रोगप्रतिकार शक्त वाडोवपाक, कातीची राखण करपाक आनी दाह उणो करपाक मजत जाता.

आवळो – तातूंत सुमार 600-700 मिलीग्राम/100 ग्रॅम जीवनसत्व सी आसता. आवळो हो जीवनसत्व सीचो सगळ्यांत गिरेस्त सैमीक स्त्रोत. तातूंत लिंबापरस 10 पटींनी चड जीवनसत्व सी मेळटा. ते सुकयल्या उपरांत लेगीत तातूंत जीवनसत्व सी उरता. आवळो रोगप्रतिकार शक्त वाडयता, पचन सुदारता आनी केंस आनी काती खातीर फायदेशीर थारता.

पेर – तातूंत सुमार 228 मिलीग्राम/100 ग्रॅम जीवनसत्व सी आसता. पेर हें फळ भारतांत सहज मेळटा आनी तातूंत लिंबापरस 4 पटींनी चड जीवनसत्व सी आसता. रगतांतली साकर नियंत्रीत करपाक मजत करता, पचन करपाक मजत करता आनी कात बरी उरता.