भांगरभूंय | प्रतिनिधी
भांगरभूंय । प्रतिनिधी
मडगांवः कुडतरी मतदारसंघांत जायती प्रलंबीत कामा भाजपाच्या माध्यमांतल्यान मार्गाक लागल्यात. फाटल्या 25 वर्सां सावन आडनदर केल्ले रस्ते, व्हाळाचीं कामां पुराय केल्यांत असो दावो करून लोकसभा वेंचणुकेंत लोकांनी भाजपाक वांगोड दिवंन दक्षीण आनी उत्तर गोयांत भाजपाच्या उमेदवारांक जैत मेळोवन दिवचें अशें आवाहन भाजपा फुडारी अँथनी बार्बोझा हाणे केलां.
कुडतरी हांका एके पत्रकार परिशेंत ताणे भाजपान केल्ल्या कामांची म्हायती दिली. तांच्या वांगडा डॉ. स्नेहा भागवत, बबिता बोरकार, जयेश नायक आनी भाजपाच्या कुडतरी मंडळाचे वांगडी आशिल्ले. कुडतरी मतदारसंघातले लोक भाजप पसून पयस रावताले. मात आतां आमी केल्ली कामां पळोवन ते भाजपाचे लागीं आयल्यात. जायते पंच वांगडी पक्षांत येवपाक इत्सूक आसात अशें बार्बोझान सांगलें. भाजपाचें म्हाजनसंपर्क अभियान सुरू आसा. सुशासन आनी लोक कल्याण हें भाजपाचें ध्येय आसा अशें डॉ स्नेहा भागवतान सांगलें.
आरजीन पयलीं काम करचें
कुडतरींतले कावलाचे अड्डे बंद करपाचें नाटक रिव्होल्युशनरी गोवन्सा वतीन सध्या चल्लां. ताणी पयलीं काम करून दाखोवचे आनी उपरांत सोशल मीडियाचेर फोटे घालचे असो सल्लो बार्बोझान तांकां दिला. जें अवैध आसा तें बंद जातले. आमी कावलाचे अड्डे बंद करतले. कागगिलांतलो कोयर दाखोवन प्रसिद्धी मेळोवाचे सुवातेर आरजीन तो नितळ करचो. पयलीं काम करचे आनी उपरांत हेरांचेर टिका करप, धमकी दिवप तांणी बंद करचें अशें ताणे सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
