भांगरभूंय | प्रतिनिधी
दिवचलः दर वर्सा कुडणें गांवांतल्या श्रीकुडणेश्वर देवळा मुखार जावपी नामनेच्या गडे उत्सवांत बरीच गर्दी जाता. हो गडे उत्सव पळोवपाक गोंय तशेंच महाराष्ट्र, कर्नाटकांतल्यानूय खास लोक येतात. अंदूं कुडणेचे गडे उत्सव 28 फेब्रुवारी, 1 आनी 2 मार्च अशें तीन दीस मनयतले. ह्या गड्यांक वाडत वचपी गर्दी मतींत घेवन भक्तांचें सुरक्षे खातीर आनी गर्देचें वेवस्थापन करपा खातीर अंदूं कुडणें गांवां भायल्या लोकांक ह्या उत्सवाक येवपाक पूर्ण बंदी घाल्या. देवस्थान समितीन हो निर्णय घेतला.
मध्यान रातच्या काळखांत हो उत्सव मनयतात. उत्सवाच्या सुवातेर व्हड गर्दे खातीर फावो ती सुविधा नाशिल्ल्यान आनी कसलीच अप्रिय घडणूक घडची न्हय म्हूण हो निर्णय घेतला. वयल्या सुचोवण्यांक पाळो दिवन हो उत्सव सुरळीत मनोवपा खातीर देवस्थान समितीक सहकार्य करपाचो उलो देवस्थान समितीन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
