भांगरभूंय | प्रतिनिधी
पुलीस बंदोबस्तांत सर्वे; लोक आनी पुलिसां मदीं झटापट
भांगरभूंय । प्रतिनिधी
दिवचल: कुडच्ऱ्यां सीएनडी प्रकल्पाच्या मुळाव्या सर्वे खातीर आयिल्ल्या शिश्टमंडळाक सर्वे करपाक कुडचिरेंच्या थळाव्या लोकांनी विरोध केल्ल्यान पुलीस बंदोबस्तांक ही सर्वे प्रक्रिया पुराय केली. ह्या वेळार थळावे लोक आनी पुलीस हांचे मदीं झटापट जाली. ताका लागून कांय वेळ तणाव निर्माण जालो.
मेळिल्ले म्हायती प्रमाण 2019 च्या आदीं कुडचिऱ्या सुमार 40 हजार चौखण मिटर जमीन आरक्षीत प्रक्रिया सुरू केल्या. ते जमनीर कन्स्ट्रक्शन अॅण्ड डिबेड्रीस प्रकल्प उबारतले. वेस्ट मॅनेडमेंट नोडल एजन्सी खाला हो प्रकल्प थंय उबारतले. थंय पोरण्या इमारतींचे अवशेश आसात. थंय प्रक्रिया करचे खातीर विशेश प्लांट उबारतले.
बिरेस्तारा थंय मामलेदार प्रवीण गांवस हांचे हाजिरेंत आनी पुलीस बंदोबस्तांत वेस्ट मॅनेजमेंट पंगड सर्वे खातीर आयिल्लो. त्या वेळार थळाव्या लोकांनी ताका विरोध केल्ल्यान कांय वेळ तणाव निर्माण जालो, तशेंच झटापट केली जाली. थंय कोयर प्रकल्प जातलो आनी ताका लागून आमकां त्रास जातलो, अशी भुमिका थळाव्यो लोकांनी घेतली आनी सर्वेक विरोध केलो. पुलीस बंदोबस्त वाडोवन लोकांक कुशीक काडले जाल्यार कांय जाणांक पुलीस स्टेशनार हाडून उपरांत सोडले. मात हे संबंदांत कोणाचेरूच कागाळ दाखल करूंक ना, अशी म्हायती मेळ्ळ्या.
मयेंचे आमदार प्रेमेंद्र शेट घडणुकेचे सुवातेर आयले आनी तांणी लोकांक समजावपाचो यत्न केलो. हो कोयर प्रकल्प न्हय जाल्यार थंय पोरण्या इमारतींचें सामान आसा, त्या सिमेंटाच्या सामानाचेर थंय प्रक्रिया जातली. ताका लागून गांवांतल्या लोकांक त्रास जावचो ना. तसो कसलोय त्रास जालो जाल्यार आपूण पुराय गांवा वांगडा, लोकां वांगडा रावतलों, अशी हमी तांणी ह्या वेळार लोकांक दिली. ते उपरांत पुराय बंदोबस्तांत सर्वेची प्रक्रिया सुरू केली.
मजगतीं, बिरेस्तारा सकाळां मुख्यमंत्री डॉ. प्रमोद सावंत हांचे वांगडा आमदार प्रेमेंद्र शेट तशेंच म्हावळींगे कुडचिरेचे सरपंच आनी पंचायत मंडळाची बसका जाली. हे बसकेंत मुख्यमंत्र्यान त्या प्रकल्पा विशींची पुराय म्हायती दिली.
हो प्रकल्प जातलो ते जमनीचे लीजधारक आसाक. तांकां सरकार जमीन दिवपाक तयार आसा, तांणी आपलीं कागदपत्रां सादर करचीं. तशेंच लोकांचो हे जमनीक विरोध आसा जाल्यार तांणी पर्यायी सुवात सांगची. तशेंच जे लीड धनी उत्पन्न घेतात तांकां काजू आनी हेर गजालींनी लेगीत सवलत दितले, अशें मुख्यमंत्र्यान बसकेंत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
