भांगरभूंय | प्रतिनिधी
गांवांत येवपी कोयर प्रकल्पाक खर विरोध
भांगरभूंय | प्रतिनिधी
दिवचलः कुडचिर्यां- बाराजण वाठारांत सरकारान सुमार 45 हजार चौखण मिटर सुवातेर कोयर विलो प्रक्रिया प्रकल्प उबारपाच्या यत्नांक थळाव्या लोकांनी खर विरोध केलो. गांवचें पर्यावरण, गांवांतले उदकास्रोत हाचो विध्वंस जातलो. खंयचेच परिस्थितींत आमकां हो प्रकल्प नाका, अशे तरेची खर भुमिका विशेश ग्रामसभेंत लोकांनी घेतली. ह्या वेळार कोयर प्रकल्पाक विरोध करपी थाराव घेतलो. ह्या वेळार सगळ्या लोकांनी ह्या थारावाक मान्यताय दिली. तशेंच अशे तरेचे यत्न फुडाराक जायत जाल्यार ते भायर मारतले अशे शेंकड्यांनी संख्येन जमिल्ल्या लोकांनी म्हणलें.
कुडचिर्यां सांतेरी देवळांत विशेश ग्रामसभेचें आयोजन केल्लें. ह्या वेळार पंचायती वतीन आनी लोकांचे हाजेरेंत घेतिल्लो थाराव वाचलो. ग्रामपंचायत वाठारांत राज्य सरकारा वतीन कोयर निर्मुलन प्रकल्प चालीक लावपाची तयारी आसा. ह्या प्रकल्पाक आयतारा जाल्ले ग्रामसभेंत सगळ्या लोकांनी विरोध केलो. हो प्रकल्प गांवाच्या बर्याक न्हय आनी पर्यावरणाकूय लुकसाण करतलो. लोकांच्यो जमनी हडप करपाचें हें सरकाराचें कारस्थान आसा. ह्या प्रकल्पाक विरोध करीत तो कुडचिरें गांवांतल्यान भायर मारचो असो थाराव सगळ्यांचे हाजेरेंत संमत जालो. तशेंच थारावची कार्यवाही करपा खातीर तो राज्य सरकार, मुख्यमंत्री, पंचायत संचालकांक धाडचो अशें ह्या वेळार थारलें. पंचायती सगळे वांगडी हाजीर आशिल्ले.
चार दिसां पयलीं बाराजाण कुडचिर्यां ह्या प्रकल्पा विशीं सर्व्हे केल्लो. तो पुरायेन पुलीस बंदोबस्तांत जालो. तेन्ना गांवच्या लोकांनी ताका खर विरोध केल्लो. तेन्ना हें प्रकरण बरेंच तापिल्लें. आमच्या गांवांत बाराजण थळ आसा ताका दैवी म्हत्व आसा. हांगा अशे तरेचो प्रकल्प करप चुकीचें. तशेंच पर्यावरण आनी गांवच्या अस्तित्वाक धोको निर्माण जावपाक शकता. ताका लागून आमकां खंयचेच परिस्थितींत अशे तरेचो प्रकल्प हांगा नाका. अशे तरेची घोशणा ह्या वेळार ग्रामसभेंत दिली. ताका सगळ्यांनी हात वयर करून मान्यताय दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
