भांगरभूंय | प्रतिनिधी
भांगरभूंय । प्रतिनिधी
काणकोणः सम्राट क्लब, कुडचडें आनी रवींद्र भवन कुडचें हांच्या जोड पालवान 2 ऑक्टोबराक दनपारां 2.30 वरांचेर रवींद्र भवनांत पयली आंतर शालेय कोंकणी एकांकी सर्त जातली.
हे सर्तींत वट्ट 6 शाळांनी वांटो घेतला. सर्ती खातीर 8 हजार, 6 हजार आनी 4 हजार अशी पयलीं तीन इनामां दवोरल्यांत. दिग्दर्शन आनी अभिनया खातीर वैयक्तीक इनामां दितले.कुडचडे आनी लागींच्या वाठारांतल्या विद्यार्थ्यांक आपले कला गुण दाखोवपाक संद मेळची ह्या हेतान ही सर्त आयोजीत केल्या असें कुडचडें सम्राट क्लबाचो अध्यक्ष मंगलदास भट हाणे सांगलें.
सर्तीचें उक्तावण नामनेचो नाट्य कलाकार आनी कुडचडें रवींद्र भवनाचो उपाध्यक्ष राजू नायक आनी सम्राट क्लब राज्य एकाचो अध्यक्ष अवीन नायक हाचे हस्तुकीं उक्तावण जातलें. इनाम भेटवण कार्यावळीक कुडचड्याचो आमदार आनी बांदकाम मंत्री नीलेश काब्राल मुखेल सोयरे म्हणून हाजीर रावतले. गोंय कोंकणी अकादेमीचो उपाध्यक्ष आनी कोंकणी लेखक वसंत भगवान सावंत आनी सम्राट क्लब गोंय राज्याचो निर्वाचीत अध्यक्ष प्रवीण सबनीस खासा सोयरे म्हणन हाजीर रावतले.
सर्तींत चंद्रभागा तुकोबा नायक शाळेची उद्धव वस्तान बरयिल्ली ‘लीडर’, सर्वोदय सोसायटी हायस्कूलाची कवींद्र फळदेसाय हाणे बरयिल्ली ‘राजकुमार शेणला ‘ रिवणच्या उत्कर्ष हायस्कूलाची मुकेश पटेकरान बरयिल्ली ‘वेळ’, कुडचडे न्यू एज्युकेशन इन्स्टिट्यूटाची परेश च्यारीन बरयिल्ली ‘बाळा:एक क्रांतीची सुरुवात’, तशेंच सांगे युनियन हायस्कूलाची पंकज नायक हाणे बरयिल्ली ‘आजोबा’ आनी सरकारी माध्यमीक विद्यालय शेल्डे हांची जया गांवकारान बरयिल्ले ‘आमी’ ह्यो एकांकी सादर करतले. सर्तीक सगल्यांनी मुजरत हाजीर रावचें अशें आवाहन सम्राट क्लब कुडचड्याचे सचीन डॉ भिसो शेटगांवकार हाणे केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
