भांगरभूंय | प्रतिनिधी
– बँकेची कर्मचारी तन्वी वस्त हिका कुडचडें पुलिसां कडल्यान अटकसांगेंः फाटल्या सप्तकांत ज्येश्ठ नागरिकांच्या फटवणुकीचें प्रकरण उक्ताडार आयिल्लें. पूण ह्या प्रकरणाची कुडचडें पुलिसांनी दखल घेवंक ना. ते समाझोतो करपांत घुस्पिल्लें. हे विशीं कुडचडें पुलिसां विशीं लोकां मदीं दुबाव निर्माण जाल्लो. पुलिसांनी ह्या प्रकरणांत गुन्यांव नोंद करपाक कळाव केल्ल्यान कुडचडें पुलीस स्टेशनाचे पुलीस निरिक्षक वैभव नायक हांची बेगोबेग राखीव दळांत बदली केली. तांचे सुवातेर कुडचडें पुलीस स्टेशनाचो ताबो पुलीस निरिक्षक तुकाराम चव्हाण हांचे कडेन दिलो. चव्हाण हांणी स्टेशनाचो ताबो घेतले उपरांत पयलीं दुबावीत तन्वी वस्त हिचे आड गुन्यांव नोंद करून कुडचडेंतल्यान ते बायलेक अटक केली.
मेळिल्ले म्हायती प्रमाण कुडचड्यार राष्ट्रीयीकृत बँकेंत काम करपी एका बायलेन कांय ज्येश्ठ नागरिकांक फटयिल्ले. फाटल्या सोमारा हे लोक आपली कागाळ घेवन न्याय मागपा खातीर कुडचडें पुलीस स्टेशनांत आयिल्ले. पूण पुलिसांनी इतल्या व्हड रकमेचे फटवणुकीचे प्रकरण आसून ते विशीं दुबाविता आड गुन्यांव नोंद करूंक ना. हे विशीं कुडचडेंच्या लोकां मदीं तिडक पातळिल्ली. तेन्नाचे पुलीस निरिक्षक फकत समझोता करपांत घुस्पिल्ले.
पत्रकारांनी हो विशय ताणून धरिल्ल्यान अखेर आठ दिसां उपरांत ते बायले आड फटवणुकीचो गुन्यांव नोंद करून पुलिसांनी ते बायलेक अटक केल्या.
कुडचड्यार मंगळारा सेंट्रल बँकेच्या फांट्यांतल्यान ज्येश्ठ नागरिकांची दिशाभूल करून लाखांनी रुपयांची फटवणूक केल्ल्याची म्हायती मेळिल्ल्यान बोवाळ जालो. ह्या बोवाळा उपरांत जायत्या जाणांच्या बँक खात्यांतली रक्कम दिशाभूल करून तेच बँकेंतल्या एका खात्यांत ट्रान्सफर केल्ल्याचे उक्ताडार आयलें.
हातूंत व्हिजन इंडिया सर्व्हिसेस प्रा. लिमिटेडच्या माध्यमांतल्यान बँकेचे उदरगती खातीर नेमिल्ल्या आपसेवी कडल्यान हो प्रकार घडिल्ल्याचे उक्ताडार आयलें. हे विशीं जायत्या जाणांनी बँक मॅनेजरा कडेन कागाळ केल्ल्याची म्हायती मेळ्ळ्या. तेच प्रमाण दुबावीत बायलेन खातें धारकांचे पयशें दिशाभूल करून परस्पर ट्रान्स्फर केल्ले. तशेंच तांकां बिरेस्तारा चेका वरवीं रक्कम दिल्लाची म्हायती मेळ्ळ्या. ही राष्ट्रीय पांवड्या वयली बँक आशिल्ल्यान कुडचडेंल्या बऱ्याच वेपाऱ्यांची आनी खाजगी संस्थांची हे बँकेंत खातीं आसात. ह्या प्रकारा उपरांत लोकांनी सदर व्यक्तीक अटक जावपाक जाय अशी मागणी केली. ह्या प्रकरणाचो तपास पुलीस निरिक्षक तुकाराम चव्हाण करतात. तांकां ह्या प्रकरणांत बरीच म्हायती मेळ्ळ्या.
मजगतीं, वरिश्ठ पुलीस अधिकाऱ्यांनी ह्या प्रकरणांची गंभीर दखल घेतिल्ल्यान लोकांनी समाधान उक्तायला. तशेंच पुलिसांनी हातूंत घुस्पिल्ल्यांचेर कारवाय करची अशी मागणी कुडचडेंतल्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
