भांगरभूंय | प्रतिनिधी
भांगरभूंय । प्रतिनिधी
कुडचडेंः कुडचडें हांगच्या दयानंद कला केंद्र आयोजीत चंदेरी महोत्सव 6 ते 8 अशे तीन दीस कोल्हापुरांत जातलो. गोंयचे पयले मुख्यमंत्री सर्गेस्त दयानंद बांदोडकार हांच्या 50वे पुण्यतिथी कार्यावळीचो एक वांटो म्हणून कोल्हापुरांत रंकाळाचेरखासा रंगमाचेयर तो जातलो.
ताची संकल्पना स्वदेश संस्कृती दर्शनाचेर आदारीत आपलो गांव, आमचें गोंय आनी आमचो भारत अशे तरेचो आसतलो. तातूंत सांगे- केंपें तालुक्यांची सांस्कृतीक परंपरे वांगडा भारतीय लोक परंपरेची वळख करून दितले. कुडचडें- सावड्डें व्हो वाठारा गोंयचो सास्कृतीक केंद्र बिंदू आसा. ह्या शारां सरभोंवतणी जायती पर्यटन थळां आसात. राजकी, सुटके झुजारी, साहित्यीक आनी कलाकारांची ही भूंय आसा. कोल्हापुरांत चंदेरी महोत्सवा वरवीं थंयच्या लोकांक तांची म्हायती दितले.
ह्या चंदेरी महोत्सव आयोजनाक राज्य सरकाराचें कला आनी संस्कृती खाते, म्हायती खातें, पर्यटन खातें, नुस्तेंमारी खातें, ग्रामीण उदरगत यंत्रणा आनी आदिवासी कल्याण खात्याचो पालोव मेळोवपाचो दयानंद कला केंद्राचो यत्न चल्ला. महोत्सवाच्या पयल्या दिसा गोंय दर्शन, कला संगम- म्हाड्डोळ हांचे वतीन लोककला कार्यावळ, कोंकणी नाट्य प्रवेश, दुसऱ्या दिसा राश्ट्रीय पांवड्यार नामना मेळयल्ल्या गोंयकार गायक, वादक, संगीतकाराची गझल कार्यावळ, वास्कोच्या नवाब शेख हांची मराठी गितां जाल्यार तिसऱ्या दिसा महाराष्ट्र दर्शन ही मराठी संस्कृतीचेर आदारीत लावणी, पोवाडे, नाट्यगितां, अभंग अशी कुडचड्यांतल्या कलाकारांची कार्यावळ जातली. तशेंच एक साहित्य विशयक कार्यावळ, भोवभाशीक विनोदी काव्य हास्य कल्लोळ आनी रातयी रायगडाला जेव्हा जाग येते ह्या नाटकांतलो एक प्रसंग कुडचडें- सावड्डे वाठारांतले नाट्य कलाकार सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
