भांगरभूंय | प्रतिनिधी
भांगरभूंय । प्रतिनिधी
कुडचडेंः दयानंद कला केंद्राच्या 7व्या चंदेरी महोत्सवाचो समारोप जालो. सभापती रमेश तवडकार समारोप कार्यावळीक मुखेल सोयरे म्हणून हाजीर आशिल्ले. चंदेरी महोत्सव म्हणल्यार सर्व धर्म समभाव आनी विविधतेंल्यान एकचाराचें प्रदर्शन तप्तरंगी कला सादरीकरणांतल्यान करपी महोत्सव. ताका लागून ताका लोकांचो सामको बरो प्रतिसाद मेळटा अशें ताणे सांगलें.
कार्यावळीक बांदकाम कंपनी जेएमडीचो धनी वरुण कुडचडकार मानाचो सोयरो म्हणून हाजीर आशिल्लो. ताणे दयानंद कला केंद्राच्या वावराची तोखणाय केली. ह्या वेळार महोत्सवांत वांटेकार जाल्ल्या गोंयच्या आनी हेर राज्यांतल्या कलाकारांक आनी महोत्सवा वेळार आयोजीत केल्ल्या सर्तींत जैतिवंत जाल्ल्यांक इनामां आनी प्रशस्तीपत्रकां भेटयली.ं सुरवेक महोत्सव समिती कार्याध्यक्ष मोर्तू नायक हाणे सगल्यांक येवकार दिलो. दोन सप्तकां चलपी व्हो महोत्सव गोंयांतलो आनी देशांतलो एकसुरो राष्ट्रीय पांवड्या वयलो महोत्सव आसा आनी तो येसस्वी करपाचे स्रय आपले वांगडी आनी ज्येश्ठ आनी अणभवी वांगड्यांक दिवपाक जाय अशें सांगलें. थळावे नगरपालिके कडल्यान जाय तितलें सहकार्य मेळूं ना उरफाटें आडमेळे हाडले हे खातीर ताणे खंत उक्तायली.
कला आनी संस्कृती खात्याचो हालीच निवृत्त जाल्लो उपसंचालक अशोक परब हाणे दयानंद कला केंद्र आनी चंदेरी महोत्सवाक आपल्या सेवा तेपार दिल्ल्या सहकार्या खातीर सभापती रमेश तवडकार हांचे हस्तुकीं ताचो भोवमान केलो. समारोप सुवाळ्याक कुडचड्यांतले ज्येश्ठ वेपारी लक्ष्मण मडगांवकार, सुभाष नायक, कलाकार ज्ञानेश्वर नायक, जयकुमार खांडेकार, अनिता नायक, वनिता वस्त, आनंदी नायक, राया देसाय, अशोक नायक हाजीर आशिल्ले. नवीन खांडेकारान उपकार मानले. बंटी उडेलकारान सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
