भांगरभूंय | प्रतिनिधी
पणजीः कुडचडें लैंगिक अत्याचार प्रकरणांतलो दुबावीत सोहम नायक हाका बाल न्यायालयान 2 दिसांची पुलीस बंदखण दिल्या.
कुडचडेंच्या लैंगीक अत्याचार प्रकरणाची चवकशी गुन्यांव फांटे तपास करता. दुबावीत सोहम नायक हाका मंगळारा न्यायालयांत हाजीर केलो तेन्ना ताका दोन दिसांची पुलीस बंदखण सांगली.
सोहम नायक हाका लैंगीक अत्याचार प्रकरणांत कुडचडें पुलिसांनी अटक केल्ली. उपरांत फुडले तपासा खातीर ही केस गुन्यांव फांट्या कडेन दिल्या. आतां मेरेन ह्या प्रकरणांत सोहम नायक हाचे आड पांच गुन्यांव नोंद जाल्यात.
तातुंतले चार गुन्यांव पिडितांच्या कागाळींचेर आदारुन नोंद केल्यात. दोन प्रकरणां कुडचडें पुलिसांनी नोंद करून गुन्यांव फांट्यांत हस्तांतरीत केल्यात. लैंगीक अत्याचार जाल्ल्या मदीं नेण्टे चलयांचोय आस्पाव आसा. एकले चलयेचेर 14 वर्सां पिरायेचेर लैंगीक अत्याचार जाल्लो. ह्या प्रकरणांतलें जबाब सध्या न्यायदंडाधिकाऱ्या मुखार नोंद करपाचें काम सुरू आसा.
पुलीस सुत्रांच्या म्हायती प्रमाण, दुबाविताची फुडली चवकशी करून घडणुके संबंदीत म्हत्वाच्यो कांय गजाली सोदून काडपाचे यत्न सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
