भांगरभूंय | प्रतिनिधी
कुडचडें: कुडचडे- काकोडा वाठारांत कथीत सॅक्स स्कँडल प्रकरणांतलो दुबावीत सोहम सुशांत नायक (20) हाचे आड पुलिसांनी आतां ’पोक्सो’ आनी ’गोंय बाल कायदो’ खाला खर कलमां लागू केल्यांत. थळावे नागरीक, लोकप्रतिनिधी आनी राजकी फुडार्यांनी दिल्ले खर शिटकावणे उपरांत आनी पुलीस स्टेशनाचेर घाल्ल्या घेरावा उपरांत प्रशासनान ही कारवाय केली.
अशें जालें सॅक्स स्कँडल उक्तडार
एके समाजीक कार्यावळींत सोहम आपल्या इश्टांक पिडेस्तांचे बुरशे व्हिडियो दाखोवन बढायो मारतालो. ह्या लैंगीक शोशणाच्या व्हिडियोंची चर्चा सगल्याक पावतकच थळाव्यां मदीं तिडकीचें वातावरण निर्माण जालें. अस्वस्थताय पातळ्ळी. ह्या प्रकरणाचे फाटभूंयेर, फाटल्या कांय दिसां सावन कुडचडें आनी काकोडा वाठारांत ह्या कथीत सॅक्स रॅकेटा विशीं नाका जाल्ल्यो चर्चा सुरू आशिल्ल्यो. सुरवातेक ठोस म्हायतीच्या उणावाक लागून पुलीस कारवाय करिनात असो आरोप थळाव्यांनी केलो. हे फाटभूंयेर कुडचडच्या नगरसेवकांनी पुलिसांची भेट घेवन ४८ वरांनी चवकशी पुराय करून कारवाय करिना जाल्यार रस्त्यार देंवपाची शिटकावणी दिली. हे शिटकावणे उपरांत पुलिसांनी तपास वाडोवन आयतारा मड्डेगाळ-काकोडच्यान दुबावीत सोहम नायक हाका ताब्यांत घेतलो. ताका अटक केल्ल्यान दुबावाक पुश्टी मेळ्ळी. गुन्यांवाची खरसाण लक्षांत घेवन पिडेस्तांच्या संरक्षणा खातीर खर कायदेशीर कलमां लावपाची मागणी नेटान जाता.
राजकी फुडारी जमले
मजगतीं, आयज सोमारा ह्या प्रकरणाक राजकीय आनी समाजीक स्वरूप मेळ्ळें. कॉंग्रेस प्रदेशाध्यक्ष अमित पाटकार, गोवा फॉरवर्ड पक्षाचे अध्यक्ष तशेंच आमदार विजय सरदेसाय, दुर्गादास कामत, विकास भगत आनी ’बायलांचो एकवोट’ संस्थेच्यो आवडा व्हीएगस हांचे वांगडा खुबश्या कार्यकर्त्यांनी कुडचडें पुलीस स्टेशनाचे निरीक्षक मेल्सन कुलासो हांकां घेरो घालो. ह्या वेळार जाल्ले चर्चेंत फुडार्यांनी असो दावो केलो, पिडेस्तांची पिराय आनी गुन्यांवाचे स्वरूप पळयल्यार फकत सामान्य कलमांच पुरो जावचीं नात. आरोपी आड पोक्सो कायदो आनी गोंय बाल कायदो लागू करून प्रकरणाची खोलायेन चवकशी करपाची मागणी केली. ह्या वेळार आमदार विजय सरदेसाय हांणी सरळ पुलीस महासंचालक आलोक कुमार हांचे कडेन संपर्क करून आनी प्रकरणांतली कायदेशीर गुंतागुंत जाणून घेतली.
कलमांचो आस्पाव
हाजीर आशिल्ल्या लोकांची तिडक पळयल्यार, पुलीस निरीक्षक मेल्सन कुलासो हांणी ह्या गुन्यांवांत पोक्सो आनी गोंय बाल कायद्याची कलमांचो आसपाव करपाचें मान्य केलां. ह्या निर्णयाक लागून आतां तपास आनी खर जावपाचो आशिल्ल्यान पिडेस्तांक कायदेशीर संरक्षण मेळपाचो मार्ग मेकळो जालो. समाजसेवक आवडा व्हिएगस हे कारवायेक येवकार दिलो, अशा गुन्यांवाक लागून समाजांतले नैतीक अधापतन आडावपाक खर ख्यास्तीची गरज आशिल्ल्याचें मत उक्तायलें.
हे कारवाये विशीं अदीक म्हायती दितना पुलीस उपअधीक्षक आशिष शिरोडकार हांणी स्पश्ट केलें, दुबावीत सोहम नायका आड मेळिल्ल्या मुळाव्या पुराव्यांच्या आदारार ’पोक्सो’ आनी ’गोवा चिल्ड्रन्स क्ट’प्रमाण गन्यांव नोंद केल्यात. तांणी पिडेस्तांक भियेनासतना मुखार येवपाचे आवाहन केलां, तांची वळख पुरायेन गुपीत दवरतले आनी प्रकरणाचो तपास सामको खरपणान करतले, अशी गवाय दिल्या. ह्या रॅकेटांत आनीक कोणाचे लागेबांधे आसात, हाचो सोद घेवपा खातीर पुलीस आतां खोलायेन तपास करतात.
आवडा व्हिएगस हांणी पालकांनी आपणाक मेळून म्हायती दिवपाचें आवाहन व्हिडियो वरवीं केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
