भांगरभूंय | प्रतिनिधी
तन्वी वस्त, आनंद जाधव हांचे आड गुन्यांव नोंद
पणजी: कुडचड्यार सेंट्रल बँक ऑफ इंडियाच्या गिरायकांची कोट्यांनी रुपयांची अर्थीक फटवणूक केल्ली. ह्या प्रकरणांत कुडचडें पुलिसांनी दुबावीत तन्वी वस्त आनी सेंट्रल बँक ऑफ इंडियाचो आदलो फांटो वेवस्थापक आनंद जाधव (रा. सातारा) हांचे आड गुन्यांव दाखल करून कारवाय केल्ली. ह्या प्रकरणांत कुडचडें पुलिसांनी वयल्या दोगां दुबावितां आड 24 गुन्यांव दाखल केले. तातूंतले फक्त चार गुन्यांवांचो तपास पुराय जाल्ल्यान न्यायालयांत आरोपपत्र दाखल केलां. जाल्यार हेर गुन्यांवांचो तपास पुलीस करतात.
मजगतीं, ह्या प्रकरणाची चवकशी सक्तवसुली संचालनालयान (ईडी) सुरू केल्या.
ह्या प्रकरणांत पयली रुझालिना कुरैया डायस हांच्यो सुमार 25 लाखांच्यो भांगराच्यो वस्ती आनी 5.50 लाखांची रक्कम तन्वीन आपल्या खात्यांत वळयिल्ल्याची कागाळ केल्ली. उपरांत क्रिस्टालिना कुतिन्हो हांचे 14.28 लाख रुपया तन्वीन आपल्या खात्यांत जमा केले. सेवेरिना फर्नांडीस हांच्या खात्यांत 1.40 लाख आनी तांचे कडल्यान घेतिल्ले 2.64 लाख अशे वट्ट 4.04 लाखांचो घोटाळो तन्वीन केलो.
कागाळदार सुषमा अस्थाना हांच्या खात्यांतले 29.69 लाख रुपया तन्वीन आपल्या खात्यांत वळयिल्ल्याची कागाळ आयिल्ली. ह्या चारूय प्रकरणांत तन्वी वस्त आनी आनंद जाधव हांचे आड गुन्यांव नोंद करून कुडचडें पुलिसांनी तपास सुरू केला.
सेंट्रल बँक ऑफ इंडियाच्या कुडचडें फांट्यांत एका बिगर सरकारी संस्थेची प्रतिनिधी म्हूण तन्वी वस्त काम करताली. ती बँकेची कर्मचारी नाशिल्ली. अशें आसून लेगीत तिका बँकेच्या कामकाजांत काम करूंक दिलें. गिरायकांनी फिक्स डिपॉझिटाची पावती मेळूंक नाशिल्ल्याच्यो कागाळी केले उपरांतूय वेवस्थापकान ताचे कडेन आडनदर केली. ताका लागून तन्वीन ते पयशे आपल्या खात्यांत जमा केल्ल्याचें पुलीस तपासांत मुखार आयलें.
दुबावीत तन्वी बँकेत आशिल्ल्या ज्येश्ठ नागरिकांक मजत करपा हेतान तांचे कडेन आपुलकीचे संबंद तयार करतालें. फिक्स डिपॉझीट करपा खातीर आयिल्ल्या वा पयशे भरपा खातीर आयिल्ल्या ज्येश्ठांच्यो सयो घेवन तांच्या खात्यांतले पयशे आपल्या खात्यांत जमा करतालें. तन्वी वस्त हिचे आड पयलीं 2023 वर्सा कागाळी आयिल्ल्यो. उपरांत तिका काडून उडयिल्लें. ह्याच वेळार 2 जुलय 2024 दिसा रुझालिना कुरैया डायस हांणी बँकेंत वयलो प्रकार नमूद केला. उपरांत आनीक कागाळी आयले उपरांत 18 नोव्हेंबर 2024 दिसा वयलो घोटाळो मुखार आयलो.
मजगतीं, ह्या प्रकरणांत मनीस लॉन्ड्रिंगेचो दुबाव आयिल्ल्यान सक्तवसुली संचालनालयान (ईडी) चवकशी सुरू केल्या. प्रकरणांत ईडी कागाळदारांची जबानी नोंद करीत आसून दुबावितां सयत बँकेच्या वरिश्ठ अधिकाऱ्यांची चवकशी जातली अशी म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
