भांगरभूंय | प्रतिनिधी
पणजी : सोलये, काकोडें- कुडचड्यार रस्त्यार अचकीत सुणो आडवो आयिल्ल्यान जाल्ल्या दुचाकी अपघातांत उत्तम गांवकार (६४) हाका मरण आयलें.
१९ फेब्रुवारीक स्कुटरीवेल्यान वतना सोलयां हो अपघात जालो. उत्तम गांवकार हांची धूव स्कुटर चलयताली आनी ते फाटल्यान बशिल्ले. अचकीत सुणो आडवो आयिल्ल्यान गाडयेवेलें नियंत्रण सुटलें आनी तीं सकयल पडलीं. गंभीर जखमी जाल्ल्यान उत्तम हांकां पयलीं काकोडेंच्या मुळाव्या भलायकी केंद्रांत व्हेले. उपरांत जिल्लो हॉस्पिटलांत, मागीर गोमेकॉंत धाडले. थंय तांकां मरण आयलें.
मजगतीं, रस्त्यांचेर हेडगीं गोरवां, सुण्यांक लागून बरेच अपघात जातात. हातूंत लोकांक मरण येता. जाल्यार कांय जाण गंभीर जखमी जातात. हाका लागून हेडगीं गोरवां, सुण्यांचो थळाव्या पंचायतींनी, नगरपालिकांनी बंदोबस्त करचो; अशी मागणी नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
