भांगरभूंय | प्रतिनिधी
निलेश काब्रालः अंदूं मिरवणुकेच्या मार्गान बदल
भांगरभूंय । प्रतिनिधी
केपें: कुडचडें सांवड्डेंचो शिगमो उत्सव 13 मार्चाक सांजेच्या 5.30 वरांचेर श्री सांतेरी देवीक नमन करून सुरू जातलो, अशी म्हायती कुडचडेंचे आमदार, भौशीक बांदकाम मंत्री तशेंच शिगमो समितीचे अध्यक्ष निलेश काब्राल हांणी पत्रकार परिशदेंत दिली. ह्या वेळर कार्याध्यक्ष अशोक नायक, जिल्हो पंचायत वांगडी सिद्धार्थ गांवस देसाय, विश्वास सावंत देसाय, नवीन खांडेकार आनी हेर वांगडी हाजीर आशिल्ले.
आदीं रेल्वे स्टेशन ते बसस्टॅण्ड ह्या रस्त्याचेर शिगम्याची मिरवणूक जाताली. मात ह्या रस्त्याचें काम चालू आशिल्ल्यान तातूंत बदल करून उजो पालोवपी दळ ते कुडचडें बसस्टॅण्ड ते पुलीस स्टेशन ह्या मार्गार जातली. शिगमो उत्सव वेळार सुरू करून वेळार सोंपोवपाचो यत्न आसतलो. तशेंच लोकनाच, वेशभुशा सर्ती खातीर सांजेच्या 5.30 वरां मेरेनूच अर्ज घेतले. जाल्यार रोमटामेळ आनी चित्ररथ सर्ती खातीरचे अर्ज सांजेच्या 6.30 वरां मेरेन घेतले. ते उपरांत आयिल्ल्या अर्जांचो विचार करचे नात. हे कार्यावळीक मुखेल सोयरे म्हूण पर्यटन विकास म्हामंडळाचे अध्यक्ष गणेश गांवकार हाजीर रावतले. तेचवरी 14 मार्चाक मुंबयच्या पंगडाची ऑर्केस्ट्राची कार्यावळ जातली, अशीय म्हायती काब्राल हांणी दिली. कुडचड्यार 16 मार्चाक शिगमो उत्सव जावपाचो आशिल्लो. तातूंत बदल करून तो आतां 13 मार्चाक मनोवपाचें थारायलां.
कुडचडें शिगमो समितीचे निलेश काब्राल अध्यक्ष
समितीचे पदाधिकारी फुडें दिल्ले प्रमाणः अध्यक्ष- निलेश काब्राल, उपाध्यक्ष- कुडचडेंची नगराध्यक्ष डॉ. जेस्मीन ब्रागांझा, उपनगराध्यक्ष रुचा वस्त, जिल्हो पंचायत वांगडी सिद्धार्थ गांवस देसाय, सगळे नगरसेवक, सरपंच, पंच, भांडारी- देवानंद भंडारी, उपभंडारी- मुकुंद नायक, सचीव- राजेंद्र वस्त, उपसचीव- नवीन खांडेकार. तशेंच सल्लागार समिती, येवकार समिती, सोमटामेळ समिती, लोकनाच समिती अश्यो विवीध समित्यो वेंचल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
