भांगरभूंय | प्रतिनिधी
केपें: कुडचडें मतदारसंघांत विकास कामाच्या नांवा खाला फाटल्या तीन वर्सां पयलीं खणून दवरिल्ले रस्ते अजून सारके केल्ले नात. हे खातीर मतदारसंघांतले लोक बेजार जाल्यात. ह्या कामांची स्थिती पळयत जाल्यार फुडल्या वर्सा लेगीत हीं कामां पुराय जावचीं नात अशेंच दिसून येता. पोरूं पावसांत रस्ते खणून दवरिल्ले, तीच स्थिती ह्या वर्सा लेगीत पळोवंक मेळटा. ह्या रस्त्यान वतना लोकांक जीव मुठींत घेवन प्रवास करचो पडटा अशें एका थळाव्या नागरिकान म्हणलें.
कुडचडें मतदारसंघांत भुंयगत विजवाहिनी आनी मलनिस्सारण वाहिनी घालपाच्या कामाक तीन वर्सां पयलीं सुरवात केल्ली. पालिका वाठारांतल्या सगल्या प्रभागांनी हीं कामां कसलीच उपाय येवजण हातांत घेनासतना सुरवात केल्ल्यान तशेंच जाग्याजाग्यांनी मुखेल रस्ते खणून दवरिल्ल्यान सामान्य लोकांक हाचो त्रास जायत आसा. तीन वर्सां पयलीं खणिल्ले रस्ते अजून सारके करूंक नाशिल्ल्यान वाहनां बरोबर लोकांची हाडांय खिळखिळी जाल्ल्याचें लोकांचें म्हणणें आसा.
वीज वाहिनी खातीर रस्ते खणून दवरले उपरांत रोखडेंच मलनिस्सारण वाहिनी घालपाचें काम सुरू केल्ल्यान रस्ते दुरुस्त केले नात, आनी आतां परतून एकदां गॅस वाहिनी घालपाचें काम सुरू केल्ल्यान पुराय मतदारसंघांतले रस्ते येरादारी खातीर घातक जाल्यात. विकास कामाच्या नांवा खाला लोकांक हाचो त्रास सोंसचो पडटा.
दरेक पालिका प्रभागांतले रस्ते तशेंच पंचायत वाठारांतले रस्ते मदेकांत खणून दवरिल्ल्यान रस्त्या वेल्यान प्रवास करप म्हणल्यार मरणाच्या सांपळ्यांतल्यान वचपा सारकें जालां. कुडचडें मतदारसंघांत जायत आशिल्लो हो विकास लोकां खातीर घातक थारूंक लागलां. पावसाच्या दिसांनी लेगीत लोकांची हातूंतल्यान सुटका नाशिल्ल्यान लोक तिडकल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
