भांगरभूंय | प्रतिनिधी
पणजी : कुडचडें लैंगीक शोशण प्रकरणांत वापरिल्ली दुबावीत सोहम नायकाची गाडी गुन्यांव अन्वेशण विभागान जप्त केल्या. ह्या प्रकरणांत जप्त केल्लो ताचो मोबायल फोन फॉरेन्सीक प्रयोग शाळेंत तपासणी खातीर धाडला.
आतां मेरेन दुबावीत सोहम नायका आड पांच गुन्यांव नोंद आसात. मंगळारा एके १९ वर्सां पिरायेचे तरणाटेन दिल्ले कागाळींत गुन्यांव अनवेशण विभागान तपास सुरू केला. ह्या प्रकरणांत दुबाविताक न्यायालयांत हाजीर करून पुलीस बंदखणींत घेवपाचो यत्न तपास अधिकारी करतात.
१९ वर्सां पिरायेचेत तरणाटेन काल, मंगळारा केल्ले कागाळींत म्हणलां, दुबावितान इश्टागत करून लग्न करपाचें उतर दिवन आपल्याचेर लैंगीक अत्याचार केले. उपरांत व्हिडियो सोशल मिडियाचेर व्हायरल केलो. जुलय २०२५ ते ९ मार्च २०२६ मेरेन संबंद प्रस्थापीत केले. केपें म्हालांतलो एक घसघसो आनी हेर सुवातांचेर व्हरून लैंगीक कत्याचार केल्ल्याचें तिणें कागाळींत म्हणलां.
गाडी जप्त
मजगतीं, लैंगीक शोशण प्रकरणांत वापरिल्ली दुबावीत सोहम नायक हाची गाडी गुन्यांव अन्वेशण विभागान जप्त केली. गाडयेंत कांय पुरावे सांपडपाची शक्यताय आसा. हे विशीं नेटान तपास करता, अशी म्हायती पुलीस सुत्रांनी दिली. ह्या प्रकरणांत जप्त केल्लो मोबायल फोनूय फॉरेन्सीक प्रयोग शाळेंत तपासणे खातीर धाडल्यात. ह्या प्रकरणांत गुन्यांव अन्वेशण विभाग खोलायेन तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
