भांगरभूंय | प्रतिनिधी
पणजी : कुडचडें लैंगीक अत्याचार प्रकरणांत तपासाचें काम व्हडा प्रमाणांत करचें पडटलें. हें प्रकरण संवेदनशील आशिल्ल्यानूच ते क्रायम ब्रँचकडेन दिलां. ह्या प्रकरणांत योग्य तरेन तपास करतात. तपासा विशीं कोणेंच कसलोच दुबाव घेवचो न्हय अशें पुलीस महासंचालक आलोक कुमार हांणी सांगलें. बिरेस्तारा भारतीय न्याय संहितेविशीं आयोजीत केल्ल्या प्रदर्शनाच्या उक्तावणा उपरांत तांणी माध्यमां कडेन संवाद सादलो.
कुडचडें प्रकरणांत पिडेस्तांची वळख कळची न्हय म्हणून काळजी घेता. पुलीस स्टेशनांत खुबशे लोक यो-वच करतात. अश्या वेळार ह्या प्रकरणाचो तपास सुरू आसल्यार पिडेस्तांची वळख कळप शक्य जावपाचें.
हाचो विचार करूनय प्रकरण क्रायम ब्रँाचकडेन दिलां. हयन पयलींय अशीं व्हड प्रकरणां क्रायम ब्रांचकडेन दिल्यांत. क्रायम ब्रांच ह्या प्रकरणाचो तपास योग्य तरेन करता, अशें आलोक कुमार हांणी म्हणलें.
ताचे पयलीं जाल्ले कार्यावळींत आलोक कुमार हांणी भारतीय न्याय संहितेच्या अंमलबजावणेंत गोंय देशांत मुखार आसा अशें सांगलें. तांणी म्हणलें, केंद्रीय गृह मंत्रालया वतीन सगल्या राज्यांची क्रमवारी काडटात. फाटल्या ५ म्हयन्यां आदीं गोंय हातूंत १९वे सुवातेर आशिल्लें. पुलीस, भलायकी , न्याय , अभियोग, बंदखण प्रशासन अशा सगल्या खात्यांच्या जोड यत्नांक लागून आयज गोंय हे क्रमवारींत पयले सुवातेर पावलां. ही आमचे खातीर अभिमानाची गजाल. हांगच्या प्रदर्शनांत गुन्यांवां पसून ते न्यायालयीन निवाडो ही प्रक्रिया समजावन सांगली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
