भांगरभूंय | प्रतिनिधी
पणजी : कुडचडें लैंगीक अत्याचार प्रकरणाचो आंवाठ वाडतूच आसा. तरीय महिला तशेंच बाल आयोगांनी हे विशीं कसलीच भुमिका घेवंक ना. ह्या प्रकरणांत दोनूय आयोगांनी खर भुमिका घेवप गरजेचें. ह्या प्रकरणांतल्यो पिडेस्त तरणाट्यो व्हड मनसीक धोक्यांतल्यान वतात. शिक्षण खात्यान तांचें समुपदेशन करचें अशी मागणी कॉंग्रेस प्रदेशाध्यक्ष अमित पाटकार हांणी केली. शेनवारा महिला कॉंग्रेस वतीन आयोजीत मोर्चा वेळार ते उलयताले. ह्या वेळार प्रतीक्षा खलप आनी हेर पदाधिकारी हाजीर आशिल्ले.
पाटकर हांणी सांगलें, भाजप सरकार कुडचडें प्रकरण चेपपाचो यत्न करता. पुलीस आरोपीक अटक करपा खातीर मुखार सरनाशिल्ले. थळाव्यांनी चेंपण हाडले उपरांत आरोपीक अटक केली. आतां मेरेन स पिडेस्तांनी आरोपी आड कागाळ दिल्या. आतां हाची व्याप्ती वाडल्या. राज्यभरांत १०० पिडेस्त आसपाची शक्यताय आसा. पुलिसांनी राज्य सरकाराच्या हातांतली बावली जायनासतना ह्या प्रकरणांत योग्य तपास करप गरजेचें. राज्यांतल्यो बायलो, चलयांक सुरक्षा दिवपाक भाजप सरकार पुरायेन अपेशी थारलां.
तांणी म्हणलें, कुडचडें प्रकरणांत आरोपीचे बापूय भाजपाचे नगरसेवक आसात. तरी आदले प्रदेशाध्यक्ष विनय तेंडुलकार ते भाजपाचे वांगडी नाशिल्ल्याचें सांगतात. आरोपी आनी ताच्या बापायचे भाजपाच्या आदल्या आनी आतांच्या प्रदेशाध्यक्षां वांगडा फोटो आसात. आरोपीचो बापूय फाटलीं ३० वर्सां भाजपा खातीर काम करतात.
राज्यांत लैंगीक अत्याचाराची प्रकरणां वाडतूच आसात. दिसाक सरासरी ९ अत्याचाराच्या प्रकरणांची नोंद जाता. पर्यटना खातीर वळखुपी गोंयची इमेज गुन्यांवांची राजधानी म्हणून जाता. राष्ट्रीय माध्यमांनीय ह्या प्रकरणाची दखल घेतल्या.
पदावेल्यान काडचें
प्रतिक्षा खलप हांणी म्हणलें, भाजप प्रदेशाध्यक्ष दामू नायक हे सुशांत नायक हांकां वाटावपाक पळयतात. नगरसेवक पद सोंपपाचो काळ जरी लागीं आयलो तरी भाजपान सुशांत हांकां पदावेल्यान काडप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
