भांगरभूंय | प्रतिनिधी
भांगरभूंय । प्रतिनिधी
कुडचडेंः दयानंद कला केंद्रा वतीन कुडचडें शारांत दर वर्सा आयोजीत करतात त्या चंदेरी महोत्सवाक केंद्रीय पर्यटन मंत्रालयाची मान्यताय मेळपाक शकता. तशे संकेंत केंद्रीय पर्यटन राज्यमंत्री श्रीपाद नायक हाणे दिल्यात. दयानंद कला केंदाच्या चंदेरी महोत्सव कार्यकारी समितीन नायक हांची भेट घेवंन चंदेरी महोत्सवाक पर्यटन मंत्रालयाचें अनुदान दिवपाचो प्रस्ताव ताका सादर केलो.
पोरूंच्या चंदेरी महोत्सवाच्या समारोपाचे कार्यावळींत श्रीपाद नायक हाणे केंद्र सरकाराच्या पर्यटन उदरगत येवजण्यांचो लाब घेवपाचें आवाहन दयानंद कला केंद्राक केल्लें. ते प्रमाण अनुदान दिवपाचो प्रस्ताव केंद्रान ताका सादर केला. केंद्रीय पर्यटन मंत्रालय पर्यटन महोत्सवांक वर्सुकी अनुदान दिता. चंदेरी व्हो गोंयांतलो पंदरा दिसांचो मुखेल उत्सव आसा आनी ताका केंद्रीय मजत मेळपाक जाय. तसो प्रस्ताव आपल्याक दिल्यार अनुदाना खातीर यत्न करपाचें आस्वासन श्रीपाद नायक हाणे दयानंद कला केंद्राक दिल्लें.
गोंय पर्यटन केंद्र जावपाचे वाटेर आसा. चंदेरी महोत्सवाक राष्ट्रीय प्रवाहांत सुवात मेळपाची गरज आसा अशें चंदेरी समितीचो कार्याध्यक्ष मोर्तू नायक, भांडारी केशव नायक आनी सचीव बंटी उडेलकार हांणी श्रीपाद नायक हाचे नदरेक हाडून दिलें. केंद्र सरकार हेर राज्यांत दोन महोत्सवांक अनुदान दिता. आमी एक चंदेरी महोत्सव गोंयांत आनी दुसरो गोंयां भायर आयोजीत करतात. अदूं केरळांत तो करपाचो विचार आसा. ते खातीर आमकां केंद्रीय अनुदान फावो जाता अशें केशव नायकान सांगलें. अंदूच्या चंदेरी महोत्सवांत देशी आनी विदेशी कलाकाराच्या कार्यक्रमांचें आयोजन जातले. ते खातीर निधीची सामकी गरज आसा अशें बंटी उडेलकारान सांगलें.
गोविंद गावडे, नीलेश काब्राल, रवी नायक, सुभाष फळदेसाय, सुभाष शिरोडकार,सुदिन ढवळीकार हे मंत्री तशेंच आडीसीचो चॅरमन रेजिनाल्ड लॉॉरेन्स,
आदलो उपमुख्यमंत्री बाबू कवळेकार, आदलो खासदार नरेंद्र सावयकार हांणी चंदेरी महोत्सवाच्या आयोजनांत मजत करपाचें निश्चीत केलां. अंदूच्या महोत्सवाच्या आयोजनाचें काम पुराय जावपाक आयलां. केंद्र सरकारान अर्थीक मजत केल्यार देशांतलो व्हो एक प्रतिश्ठीत महोत्सव जावपाक शकतलो अशें समितीन श्रीपाद नायक हाका सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
