भांगरभूंय | प्रतिनिधी
सांगें : सुवात उणी पडिल्ल्यान कुडचडेंच्या संजय हायस्कुलाच्या विद्यार्थ्यांक दोन सुवातांचेर शिक्षणाचे धडे शिकयतात. हाका लागून विद्यार्थ्यांक बरेच त्रास सोंसचे पडटात. दिव्यांग विद्यार्थांक हे त्रास जावचे न्हय, तशेंच एकेच सुवातेर शिक्षणाचे धडे आनी हेर येवजण्यो उपलब्ध करून दिवपा खातीर येवपी देड वर्सांत हायस्कूल पुराय करून दितले अशें कुडचडेंचे आमदार निलेश काब्राल हांणी सांगलें. ते कुडचडेंच्या रवीद्र भवनांत संजय हायस्कुलान आयोजीत केल्ल्या स्नेह संमेलनांत मुखेल सोयरे म्हणून उलयताले.
ह्या वेळार नगराध्यक्ष प्रसन्ना भेंडे, हायस्कुलची इन्चार्ज मिनास शेख, मुख्याध्यापक तातू कुडालकर, पालक शिक्षक संघाचे अध्यक्ष सुभाष भंडारी आनी हेर मानेस्त हजर आशिल्ले.
स्कुलाचे विद्यार्थी जरी दिव्यांग आसले तरी सगळ्या मळांचेर तांका येस फावो जाता. सिया सरोदे सारकिल्ले विद्यार्थीनीन आंतराष्टीय पांवड्यार गोंयचें तशें भारत देशाचें नांव वयर काडलां. हायस्कुलाच्या बर्या कामा खातीर हांव पुरायेन मजत करतलों अशें काब्राल हांणी मुखार सांगलें.
नगराध्यक्ष प्रसन्ना भेंडे हांणी, संजय स्कुलाचे विद्यार्थी बरेच हुशार आसात. तांकां फकत मोग आनी मायेची गरज आसा. तांचे खातीर हायस्कुलाची इमारत कामाक घेवया अशी इत्सा तांणी उक्तायली.
ह्या वेळार बारावी येसस्वी आनी धावी येसस्वी विद्यार्थ्यांचो भोवमान केलो. हातूंत बारावेचे मुक्तार महिद्दीन शेख (८६ टक्के), रुशील राजेंद्र नायक (७६.६ टक्के), अब्दुलहानी इम्तियाज शेख (८१.५ टक्के), अनाइजा राॅड्रिगीस (७९.८ टक्के), पॅन्सी इनासियो बारेटो (८०.१ टक्के), मेलब्रेट मानुयल पेरेरा (८४.३ टक्के), स्वयम भगवान कुंकळेंकार (७६ टक्के), आर्यन ईजाज अहमद (७६.३ टक्के), तशेंच धावेचे डेरन पिक्सेटो (९३ टक्के), सिया शिवाजी सरोदे (८५.३ टक्के), डेयरल फर्नांडीस (९० टक्के), रईजा पेरेरा (९४ टक्के) आनी नितेश निलेश केणी (८३ टक्के) हांचो आसपाव आसा. येवकार मुख्याध्यापक तातू कुडाळकार आनी सुत्रसंचलन लारा पेरेरा हांणी केलें. उपकार मिनास शेख हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
