भांगरभूंय | प्रतिनिधी
केपें : राज्यभर काल सावन सुरू जाल्ल्या पावसाक लागून जायत्या सुवातांचेर झाडां पडल्यांत. आयजूय परिस्थिती तशीच आशिल्ल्यान ह्या सकाळसावन पडपी घोग्यांनी पावसाचो फटको कुडचडेंच्या शेतकारांक बसला. काकूमड्डी कुडचडेंच्या नंदा तळ्याच्या बंधार्याचीं दारां उगडिल्ल्यान माड बाणसायच्या शेतांत व्हडा प्रमाणांत उदक गेलां. हाचो परिणाम सुमार पन्नास शेतकारांचें लुकसाण जालां.
मान्सूनपूर्व पावसान बरोच नेट धरिल्ल्यान मंगळार सावन ह्या वाठारांनी उदक सांठून उरूंक लागलां. हाचो फटको माड बाणसाय हांगचे शेतीक बसला. पावसाच्या उदका वांगडाच नंदा तळ्यांतल्यान सोडपी उदकाक लागून सुमार पन्नास शेतकारांची शेती उदका पोंदा गेल्ल्याचें शेतकार संतोष देसाय हांणी सांगलें.
ह्या वाठारांतल्या कांय शेतकारांनी शेताची मशिना वरवीं कापणी पुराय केल्ली आनी आमी कापणेचे तयारेंत आशिल्ले. मात अचकीत आयिल्ल्या पावसाक लागून आमचीं शेतां नश्ट जाल्ल्याचें तांणी सांगलें.
ह्या लुकसाण जाल्ल्या वाठाराची पळोवणी केपेंचे विभागीय कृषी अधिकारी कृतिराज नायक गांवकार आनी सचिन गांवकार हांणी केली. शेतकारांची भेट घेवन तांणी खंयचेच परिस्थितींत लुकसाण भरपाय मेळोवन दिवपाचें आस्वासन शेतकारांक दिलां.
अचकीत पावस पडिल्ल्यान शेतकारांचें लुकसाण जालां. हातूंत कोणाचो दोश ना. मात शेत कापणेच्या वेळारूच हें संकट आयिल्ल्यान आपूण हातूंत स्वता लक्ष घालून लुकसाण भरपाय मेळोवन दिवपाक यत्न करतलों अशें नायक गांवकार हांणी सांगलें.
आमी व्हडा कश्टांनी ही शेती केल्ली. दरेका शेतकारान साठ हजार ते एक लाख रुपया शेतांचेर खर्च केल्ले. तो खर्च, वेळ आनी आमची मेहनत कालच्या पावसाक लागून फुकट गेली, अशें सुयश सावंत ह्या शेतकारान सांगलें. राज्य सरकारान आमकां लुकसाण भरपाय दिवची अशी मागणीय शेतकारांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
