भांगरभूंय | प्रतिनिधी
संदीप मापारी,
96731 71992
गोंय कलाकारांची खण म्हणून प्रसिद्ध आसा. दरेका तालुक्यांत सैम फुल्ला, पर्जळला, कलाकारांनी नटला. गोंयच्या लोकांची तान भागोवपी साळावलेचें धरण, दुदसागर, मैनापी, सावरी सारकिल्ले मनभुलोवणी घसघशे, श्री चंद़ेश्वर पर्वत, मांडवी, जुवारी, कुशावती न्हंयेचें पावित्र्य. ह्या सगळ्या सैमीक, सांस्कृतीक वातावरणांत जल्म घेतिल्लो कुडचडेचो ‘युवा स्वराज स्पोर्टस् अॅण्ड कल्चरल क्लब’. हे संस्थेन धा वर्सां भितर दोळे दिपकावपी कार्य करून तरनाट्यांक, बायलांक योग्य माची मेळोवन दिल्या. खेळ, कला, संस्कृती, भलायकी, शिक्षण, समाज सेवा, आनी हेर जायत्या मळांचेर तांचें मोलाचे योगदान आसा. राष्ट्रबांदणी खातीर यथायोग्य अशें योगदान दिवपाची ताक तांचे कडेन आसा. दर्जेदार कार्यावळी सातत्यान आयोजीत करप हेंच युवा स्वराज संस्थेचें खाशेलपण. आयज तांकां धाव्या वर्धापन दिसाचीं परबीं भेटयतना खोशी भोगता.
14 फेब्रुवारी 2014 दिसा आमदार निलेशबाब काब्राल हांचे हस्तुकी युवा स्वराजाची स्थापन जाली. कला संस्कृती आनी आमचें दायज तिगोवन उरचें खातीर तरनाट्यांक एकठांय करून संस्कृतायेची पालखी तांणी भुजार मारल्या. आपले बरोबरच गोंयच्या हेर संस्थांक प्रोत्साहन दिवपाचें कार्य युवा स्वराज बरे तरेन हाताळटा. गांवच्या बायलांक एकठांय करून तांकां विविध लोककला प्रकार शिकोवपाचें काम ते करतात. अखिल गोंय पांवड्यार वयली लोकनाच, दिंडी, फुगडी, आरती, भजन तशेंच हेर सर्तीं करून गोंयच्या कलाकारांक ते माची दितात. गुरुपौर्णिमा, शिक्षक दीस, गांधी जयंती अशा कितलेश्याच कार्यक्रमाचें आयोजन ते करतात. लोकनाच, कोंकणी नाटक, गोंयच्या नामनेच्या संस्थांनी आयोजीत केल्ल्या कार्यक्रमांनी वांटेकार जावन तांणी इनामां जोडल्यांत. दुरदर्शनाचेर लोककलेच्यो कार्यावळी सादर करून नांव जोडलां. चवथीच्या निमतान ते वर्सुकी आरती संग्रह उजवाडाक हाडटात. संस्थेच्या वर्धापनदिसा (14 फेब्रुवारीक) ते सत्यनारायण म्हापुजा, समराधनेचें आयोजन करतात. कुडचडे वाठारांत दांडियाची कार्यावळ घडोवन तांणी नांव जोडलां. संगीत शिक्षणाचें साहित्य उपलब्द करून दितात. वाचन संस्कृताय वाडची हे खातीर वाचनालयाचें उक्तावण आमदार निलेश काब्राल हांचें हस्तुकी केलां. भलायकी बरी उरची हे खातीर जीम उक्तो केला.
आर्थिक नियोजनाचीं विविध तासां, कायदेशीर सल्लो, वेवसायीक प्रशिक्षण असल्या विशयाचेर तज्ञांचीं व्याख्यानां आयोजीत करपाक ते भर दितात. भलायके विशींची, रक्तदान शिबीरां करुन गरजवंत लोकांक सहकार्य करपाचें कार्य केलां, तांकां जाय तीं फुकट वखदां उपलब्द करून दिल्यांत. अडचणीच्या वेळार मजतीक धावून वचपी संस्था म्हणून ह्या क्लबाची नामना आसात. कोरोना धामीचें फाटभूंयेर क्लबाच्या वतीन गरजवंतांक भाजयो, कड्डण आनी हेर सामानाचें वाटप तांणी केलें. इतल्यारच हे कार्य सोंपनासताना कुडचडेंतल्या एकान एक आस्थापन, बँकांक, शाळांक मास्काचें वाटप केलें. गरजेवंतांक जेवणाची सोय केली. आपलो देश, राज्य, गांव सदांच प्रगतशील उरचो हे खातीर जें कितें शक्य आसा, तें करपा खातीर बांदील आशिल्ल्या युवा स्वराजाचें कार्य तोखणाय करपा सारकें आसा.
तांच्या ह्या कार्यां खातीर तांकां सात ISO (certified institution) फावो जाल्यात. आदर्श युवा संघ काणकोण, सांगे केपे पत्रकार संघ, नेहरू युवा केंद्र मडगाव तशेंच मुख्यमंत्री डॉ प्रमोद सावंत हांचोय तांकां ‘बरी संस्था’ म्हणून पुरस्कार मेळ्ळा. हे कार्य युवा स्वराज क्लबाचें अध्यक्ष प्रतीक प्रभाकर वस्त गोंय राज्यांतूच न्हय जाल्यार पुराय देशात पावचे म्हणून यत्न करता. ह्या कार्यांक तांकां उपाध्यक्ष सर्वेश नायक, सचीव रवित नायक, जोड सचीव अनिकेत नायक, भांडारी संकेत कवठणकर, जोड भांडारी हर्षद पटेल, आनी हेर वांगड्यांचे मोलाचें सहकार्य मेळटा.
संस्कृतायेची पालखी मुखार व्हरपाक तांकां बळगें आनी येश मेळू.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
