भांगरभूंय | प्रतिनिधी
कुडचडें सध्या तिडकीन खदखदता. कारण जालां कथित सेक्स रॅकेट. एका नगरसेवकाच्या दिवट्या पुतान खंय कांय चलयो, बायलां वांगडा लैंगीक संबंद दवरल्यात. ह्या प्रकरणाचे खंय व्हिडियो व्हायरल जाल्यात. ही गजाल तीन दिसां पयलींची. जर सत्य आसा, जाल्यार पुलिशेन तपास करपाक नाका? ते कोणाक भियेतात काय तांचेर चेपण आसा? अमेरिकेक अॅपस्टीन फायल गाजता, महाराष्ट्रांत तांत्रिक खरातबाबा प्रकरण वयर सरलां. आतां कुडचडेंचेंय नांव येताशें दिसता. गृह खात्यान ह्या प्रकरणाचो सोद घेवपाचो तत्काळ आदेश दिवंक जाय. कारण ही विकृतीची कीड अशीच वळवळपाक लागली जाल्यार गांवांगांवांनी पावतली. आपूण राजकी फुडारी वा आपलो बापूय, भाव लोकप्रतिनिधी म्हणटकच कोणाक जाय तसो वागपाची परवानगी कायदो दिना. कोणाक उखलून व्हरपाचो, खून करपाचो परवानो मेळना. 2015 वर्सा ह्याच वाठारांत एका ड्रायव्हराचो खून जाल्लो. ताचे आरोप एका आमदाराच्या कुटुंबाचेर जाल्ले. मागीर अटक, निर्दोश सुटका, गूढ मरण….!! आतां हें प्रकरण कुडचडेंच्या माथ्यार बाॅम्ब जावन टिकटीक करता.
कुडचडेंचे नगराध्यक्ष आनी हेर नगरसेवक काल पुलिसांक मेळ्ळें. तांणी ह्या कथित सेक्स रॅकेटाची 48 वरां भितर चवकशी करपाची मागणी केल्या. नाजाल्यार रास्ता रोको, कुडचडेंचो बाजार बंद करपाची शिटकावणी दिल्या. नगरसेवकाचो पूत म्हणटकच लोकांचो दुबाव तांचेर वता. गरज नासतना ते बदनाम जाल्यात. अस्वस्थ जाल्यात. घडये तांकां आनी लोकांक हो दिवटो कोण तो अदमास आसतलो. पूण पुरावे नाशिल्ल्यान ते कोणाचें नांव घेवंक शकनात. सगले मेळून 15 नगरसेवक आसात. तो पूत तांच्या मदल्या एकाचो काय आदल्या नगरसेवकाचो हाचो तपास लावन, पुलिसांनी ह्या प्रकरणाचेर चड उजवाड घालूंक जाय. पुलिसां कडेन कागाळ पावल्या म्हणटकच तांणी सगल्या नगरसेवकांच्या पुतांक आपोवन चवकशी करपाक जाय आशिल्ली. तीन दीस उशीर करप योग्य न्हय. पूण हें कथित प्रकरण पुलिसांनी संवेदनशीलपणान हाताळचें पडटलें. कारण भितर घुस्पयिल्ल्यो बऱ्योच चलयो नेण्ट्यो आसात. नातेसंबंद आसल्यार दुबावीताचें नांव गुपीतूय उरूंक शकता.
तरणाटे भुरगे अशे कित्याक वागतात, ताचे फाटल्यान बरींच कारणां आसतात. आपल्या घरच्यांची वयर मेरेन वळख आसा. कोण कांय करपाक शकनात. हाचे पयलींय म्हज्या केंसाक पसून धक्को लागूंक ना, अशी भावना जाली काय मागीर तरणाटे कितेंय करपाक भियेनात. डिजीटल तंत्रज्ञानाक लागून गुप्त चित्रीकरण सोंपेपणी जाता. व्हिडियो काडप हे थोड्यांक शक्त वा नियंत्रणाचें साधन दिसता. ब्लॅकमेल करपाक ताचो मागीर उपेग जातलो, अशें तांकां दिसता. लैंगिक शिक्षण नाशिल्ल्यान ते विशींच्यो मर्यादा, कायदे खबर नासतात. पुरुशसत्ताक मानसिकताय वाडूंक लागल्या. चलयेचेर आपलो अधिकार अशी भावना बऱ्याच तरणाट्यां मदीं आसता, इश्ट, घरच्या संस्कारांतल्यान ती तयार जाता. चलयांकूय रफ वागपी, सिगार फुसकावपी, पयशेवालो. असले ‘मर्द’ चले आवडपाक लागल्यात. असलें कितें केलें काय इश्टां मदीं तो चलो हिरो जाता. तातूंतल्यान व्हिडियो बी काडपाच्यो कृती वाडटात. तेन्ना पालकांनी, शिक्षकांनी, समाजान हाचेर लक्ष दवरपाक जाय.
व्हिडियो व्हायरल जाल्यात तर पुलिसांक स्वता जावन गुन्यांव दाखल करूंक मेळटा. आयटी कायदो, छळ, ब्लॅकमेलिंग सारकीं कलमां वापरून. चलयो कागाळ करपाक येतल्यो, हाची वाट पळोवपाची तशी गरज ना. पुलिसां कडल्यान संवेदनशीलताय अपेक्षीत आसा, कागाळ ना म्हूण कारवाय ना, हो दिश्टीकोन पुरायपणान योग्य म्हणपाक मेळचो ना. असल्यो घडणुको ते व्यक्ती पुरत्यो मर्यादीत उरनात. त्यो चलयांचे सुरक्षेचेर, मानसीक भलायकेचेर गंभीर परिणाम करतात. समाजान पिडेस्त
चलयांक तेंको दिवंक जाय. कुडचडेंचें हें प्रकरण म्हणल्यार ‘समाज परिक्षा’च म्हणचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
