भांगरभूंय | प्रतिनिधी
पणजी : कुडचडच्या लैंगीक अत्याचार प्रकरणांत कागाळी दिवपाक मुखार येवप्यांचो आंकडो वाडतूच आसा. ह्या प्रकरणांत दुबावीत सोहम नायका आड आनीक एक कागाळ नोंद जाल्या. १४ वर्सां पिरायेचे चलयेचे कागाळीवेल्यान हो गुन्यांव नोंद केला. आतां मेरेन ताचेर वट्ट ४ गुन्यांवांची नोंद जाल्या.
ह्या प्रकरणाचो सध्या क्रायम ब्रांच अदीक तपास करता. क्रायम ब्रांचान काल तपासाचे फाटभूंयेर सोहमाच्या घराचो तपास केलो. ह्या प्ररणांत २० तरणाटेंचेर लैंगीक अत्याचार जाल्ल्याचो भंय उक्तायला. हातूंत कांय नेण्ट्या चलयांचो आसपाव आसा.
सोहमान आपूण कांय चलयांचें लैंगीक शोशण करून व्हिडियो केल्ल्याची म्हायती आपल्या इश्टांक दिल्ली. हाचे उपरांत हें प्रकरण मुखार आयलें. थळावे आनी कांय नगरसेवकांनी कुडचडें पुलीस स्टेशनाचेर मोर्चा व्हरून ह्या प्रकरणांत गुन्यांव नोंद करून खोलायेन तपास करपाची मागणी केल्ली. ना जाल्यार आंदोलनाची शिटकावणी दिल्ली. उपरांत कुडचडें पुलिसांनी ह्या प्रकरणांत गुन्यांव नोंद केल्लो. ह्या प्रकरणाची संवेदनशीलता पळयले उपरांत प्रकरण तपासा खातीर क्रायम ब्राच कडेन दिलां. सध्या तपासाक गती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
