भांगरभूंय | प्रतिनिधी
भांगरभूंय । प्रतिनिधी
पोरणे गोंयः कुडका पंचायत वाठारांत बांदकाम बंदी विभागांत चलल्ल्या दोंगोर कापपाच्या प्रकारा आड सान्त आंद्र्चो आमदार विरेश बोरकारान नगर आनी नियोजन खात्या कडेन लेखी कागाळ केल्या. ह्या संबंदांत ताणे मुख्य नगर नियोजक जेम्स मॅथयू हांची भेट घेवन ताणे ह्या कामाक दिल्लो परवानो रद्द करून जमीन पयलीं आशिल्ली तशी करून घेवपाची मागणी केल्या.
दोंगोर कापपाचें काम सध्या चल्लां तो वाठार बांदकाम बंदी विभाग आसा अशें बोरकारान पत्रकारांक सांगलें. दोंगोर कापपाचें काम चल्लां तो बांदकाम बंदी विभाग आसलो तरी तो सेटलमेंट विभाग करपाक नगर आनी नियोजन खात्याान मान्यताय दिल्या. बिल्डराचो फायदो जावचो हे खातीर खातें वावुरता हें हातूंतल्यान स्पश्ट जालां असो आरोप करून खात्यान दिल्ली परवानगी बेगोबेग रद्द करपाची मागणी ताणे केल्या.
ह्या कामाची पळोवणी करून कागदपत्रांची बारीकसाणेन तपासणी करपाक बोरकारान खात्याक सांगलां. बांदकाम बंदी विभागांत कसल्याचे तरेचें काम करपाक मेळना. ताका लागून दिल्ली परवानगी नगर नियोजन खात्याक रद्द करचीच पडटली अशें ताणे सांगलें. खात्यान कारवाय केली ना जाल्यार भाजपा सरकार बिल्डरां खातीर वावुरता हें स्पश्ट जातलें. नगर आनी नियोजन खातें कांयच तपासून पळयनास्तना परवाने दिती आनी तांचे कडेन कागाळ केल्यार मान्यताय दिल्या अशें सागून सगळें फावडून उडयता असो बोरकाराचो आरोप आसा.
मजगतीं, कुडकाचो उपसरपंच विनेश आडपयकार हाक दोंगोर कापपाच्या कामां विशीं विचारलें तेन्ना ताणे पयलींच्या पंचायत मंडळान ह्या कामाक मान्यताय दिल्ली. ह्या प्रकल्पा विशीं आमकां कांय खबर ना अशें सागलें. पयलींच्या पंचायत मंडळांतल्यान कांय पंच वांगड्यां कडेन चवकशी केली तेन्ना दोन वर्सा पयली ह्या प्रकल्पाक मान्यताय दिल्ली अशी म्हायती तांणी दिली. हाचे पयलीं कागाळ आयिल्ली तेन्ना प्रकल्पाचें काम बंद केल्लें. मात बिल्डरान वरिश्ठ सरकारी अधिकाऱ्यां कडल्यान दोंगोर कापपाची परवागी मेळयली अशेंय ह्या पंच वांगड्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
