भांगरभूंय | प्रतिनिधी
आमदार विरेश बोरकार हांचें पंचायत संचालनालयांत निवेदन
पणजीः कुडका आर्मी कॅम्पा लागसारा उबारिल्ली बेकायदेशीर झोपडपट्टी मातयेभरवण करची. हे विशींचे स्पश्ट निर्देश उच्च न्यायालयान दिल्यात पूण अजून मेरेन थळावे पंचायतीन कसलीच कारवाय हे झोपडपट्टे आड करूंक ना. तशेंच कुडका पंचायतीन बांबोळे एक मेगा रिसोर्ट प्रकल्पाक दिल्ले दाखले फाटी घेवचे, अशीं मागणी थळावे आमदार विरेश बोरकार हांणी केल्या.
आमदार बोरकार हांणी पंचायत संचालनालयाक भेट दिली. बांबोळे वर्ल्डवायड रिसोर्टाक दिल्लो दाखलो फाटीं घेवपाक लावचो तशेंच कुडका आर्मी कॅम्पाक तेंकून उबारिल्ल्यो झोपडपट्ट्यो उच्च न्यायालयाच्या आदेशांक पाळो दित मोडून उडोवच्यो, अशी मागणी करपी निवेदन पंचायत उप-संचालक कृष्णनाथ पांगम हांकां भेटयलें. निवेदन दिले उपरांत बोरकार हांणी सांगलें, पंचायत संचालक सिद्धी हळर्णकार ही गैरहजर आशिल्ल्यान तांणी उपसंचालकांक हें निवेदन भेटयलां.
बांबोळे वर्ल्ड वायड रिसोर्टांक नगर नियोजन खात्यान तशेंच पर्यावरण खात्यान दिल्ले दाखले दोनय खात्यांनी रद्द केल्यात. ह्या प्रकल्पाचें काम बेकायदो आसा देखून ह्या प्रकल्पांक पंचायतीन दिल्ले सगळे दाखले फाटीं घेवपाचे निर्देश कुडका पंचायतीक दिवचे अशी मागणी आमी उप संचालकांकडेन केल्या, अशें बोरकार हांणी सांगलें.
तशेंच बिगर गोंयकारांनी कुडका आर्मी कॅम्प लागसारा झोपडपट्टी उबारल्या. तांकां बेकायदो उदका आनी लायटीची जोडणी दिल्या तशेंच ह्यो झोपड्यो रस्त्यांक तेंकून बांदल्यात. हे विशीं स्वेच्छा दखल उच्च न्यायालयान घेवन रस्त्यार अतिक्रमण करपी बांधकामा मोडून उडोवपाचो आदेश दिल्लो देखून हे आदेश पाळीत ही झोपडपट्टी मोडून उडोवपाची मागणी आमी केल्या, अशी म्हायती बोरकार हांणी केल्या.
पंचायत संचालनालयान २००२ वर्सांत ह्यो झोपड्यो मोडून उडोवपाचो आदेश दिल्लो. मात त्या आदेशाचेर कसलीच अंमलबजावणी जावंक ना. तशेंच वर्स २०२२त आमी एक निवेदन लेगीत भेटयलें. आतां उच्च न्यायालायान पंचायत संचालनालय आनी जिल्लोधिकार्यांक हे विशींचे निर्देश दिल्यात. मात अजून मेरेन हे झोपडपट्टी विशीं संचालनालयान अनुपालन अहवाल दिला काय असो प्रस्न विचारल्यार अधिकार्या कडेन जाप ना, असो आरोप बोरकार हांणी केलो.
पंचायतींत सचिव एका जाग्यार तीन वर्सा परस चड तेप आसपाक शकना. मात तीन वर्सां मायज जालीं कुडका पंचायतींत तोच सचीव आसा. हांगा चेंपण घालून व्होट बँक पाॅलिटीक्स चल्लां. पंचायतीची मनमानी चल्ल्या देखून आतां आमी पंचायत मंत्री मावीन गुदिन्हो हांचे फाटल्यान लागतले. आमी शुक्रारा मेरेन ही झोपडपट्टी मोडून उडोवपाचो वेळ दिला. ना जाल्यार आमी फुडली पावलां उबारतले, अशी शिटकावणी बोरकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
