भांगरभूंय | प्रतिनिधी
वजन माप विभागाच्या वास्को कार्यालयान केली तपासणी
वास्को: वजन माप विभागाच्या वास्को निरीक्षक कार्यालयान सोमवारा कुठ्ठाळेच्या एचपीसीएल गॅस एजन्सीच्या वाहनांतल्या ५३ घरगुती गॅस सिलिंडरांची अचकीत तपासणी केली. तेन्ना ३१ सिलिंडरांनी ७५० ग्रॅम ते १.८ किलोग्रॅम गॅस उणी आशिल्ल्याचें कळटांच हे सिलिंडर जप्त केले. हे विशीं संबंदीत कंपनीक कळयलां. उपरांत कंपनी ह्या सिलिंडरांची तपासणी करून संबंदीत एजन्सी आड योग्य कारवाय करतली. मजगतीं, गिरायकांनी एलपीजी घरगुती गॅस सिलिंडर घेतना सदांच वजन करूनच घेवंचे अशें वास्को कार्यालयाचे निरीक्षक लिलाधर कुंभारजुवेंकार हांणी सांगलें.
कुठ्ठाळेच्या संबंदीत एजन्सीच्या वाहनांत गिरायकां डिलिव्हरी करपा खातीर ५३ घरगुती गॅस सिलिंडर दवरिल्ले. वास्को कार्यालयाचे निरीक्षक लिलाधर कुंभारजुवेंकार हांच्या मार्गदर्शना खाला हेर कर्मचारी केवल देसाय, दामोदर पाऊसकार, ईझेबियो गोम्स, रत्नाकर फळदेसाय हांणी ह्या गॅस सिलिंडरांची तपासणी केली. तेन्ना ३१ गॅस सिलिंडरांचें वजन उणें आशिल्लें. घरगुती गॅस सिलिंडरांचें वजन १४. २ किलोग्रँम आसता. ताका लागून वजन करतना सिलिंडरांचें वजन चड त्या सिलिंडरांनी आशिल्लो १४.२ गॅस अशें एकूण वजन मानलें. त्या ३१ सिलिंडरांचें वजन करतना उणेंच ७५० ग्रॅम ते चडांत चड १.८ किलोग्रॅम गॅस उणी आशिल्ल्याचें उक्ताडार आयलें. गॅस सिलिंडराच्या वट्ट वजनांत १५० ग्रॅम मेरेन परवानगी योग्य समजता. तशेंच कुठ्ठाळेच्या ते एजन्सी वतीन डिलिव्हरी करपाक व्हरपी गॅस सिलिंडराच्या तुटींत बरोच गोंदळ दिसलो. हे ३१ गॅस सिलिंडर वजन माप कायदो २००९चें कलम १५ प्रमाण जप्त केले. हे विशीं योग्य पंचनामो केलो.
ह्यान पयलीं झुआरीनगर हांगच्या गॅस एजन्सीचेर अचकीत छापो मारिल्लो आनी सिलिंडरांची तपासणी केल्ली. तेन्नाय अशेंच चित्र सामकार आयिल्लें. उपरांत हे एजन्सीची चोवकशी सुरु केली. मजगतीं थंयच्या सिलिंडरांची डिलिव्हरी करपाचें काम हेर दोन एजन्सींक दिल्लें. आतां कुठ्ठाळेच्या त्या एजन्सीच्या गॅस सिलिंडरांचे वजन उणें आयिल्ल्या हो प्रस्न परत मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
