भांगरभूंय | प्रतिनिधी
वास्को: कुठ्ठाळे उड्डाण पुलार काल (आयतारा) मध्यान रातीं सुमार सवाय एक वरांचेर जाल्ल्या अपघातांत कोन्सुआ कुठ्ठाळे रावपी के. एच. बिक्रम सिनघा (21) आनी ए. परिटोन सिनघा (23) ह्या दुचाकी चालकांक मरण आयलें. ह्या प्रकरणांत वेर्णें पुलिसांनी पंचनामो केला.
पुलिसांनी दिल्ले म्हायती प्रमाण मूळ आसामचे पूण कामा निमतान कोन्सुआ कुठ्ठाळे रावपी के. एच बिक्रम आनी ए. परिटोन हे दोगूय आयतारा मध्यान रातीं सवाय एक वरांचेर मोटारसायकलीन पणजे सावन वेर्ण्यां वताले. के. एच. बिक्रम हो मोटारसायकल चलयतालो.
कुठ्ठाळे उड्डाण पुलार पावतकच बिक्रम हाचो मोटारसायकली वेलो ताबो सुटलो. ताका लागून रस्तो दुभाजकाक मोटारसायकलीचो धपको बसून मोटारसायकल दुभाजका वेल्यान रस्त्याचे दुसरे वटेन गेली. त्याच वेळार वेर्णें सावन पणजे वचपी एका स्कोडा मोटारीक त्या मोटारसायकलीचो धपको बसलो. ताका लागून ते दोगूय रस्त्यार मोटारसायकली सयत आपटले.
त्या दोगांकूय गंभीर जखम जाल्ल्यान रोखडेंच उपचारा खातीर बांबोळे गोंय वैजकी म्हाविद्यालयांत हालयले. पूण थंय तांकां मरण आयिल्ल्याचें जाहीर केलें.
ह्या अपघात प्रकरणांत वेर्णें पुलिसांनी पंचनामो केला. पुलीस निरिक्षक आनंद शिरोडकार हांच्या मार्गदर्शना खाला बायल पुलीस उपनिरिक्षक प्रमिला फर्नांडीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
