भांगरभूंय | प्रतिनिधी
पणजी: फाटल्या पांच वर्सांच्या काळांत गोंयांत टीबी दुयेंसांची संख्या 7.44 टक्क्यांनी वाडल्या. 2021 वर्सा गोंयांत टीबीचे 1075 दुयेंती सांपडिल्ले. 2025 वर्सा ते वाडून 1155 जाले. मजगतीं, मतदारसंघवार पळयत जाल्यार कुठ्ठाळे सगल्यांत चड 330 दुयेंती सांपडिल्ले. जाल्यार केप्यां 319 आनी कळंगूट मतदारसंघांत टीबीचे 316 दुयेंती सांपडिल्ले. सांत आंद्रें मतदारसंघांत सगल्यांत उणें म्हणल्यार 10 दुयेंती सांपडिल्ले. जाल्यार ताळगांवां 22 दुयेंती सांपडिल्ले.
मेळिल्ले म्हायती प्रमाण वयल्या काळांत मडगांव (290), पर्यें (263), पर्वरी (226), सांखळी (223), म्हापशें (220), दिवचल (187), थिवी (183), मडकय (172), फोंडें (168), सांवड्डें (154), शिरोडें (151) ह्या मतदारसंघांनी टीबीचे दुयेंती तुळेन चड आशिल्ले. जाल्यार कुमारजुंवें (34), बाणावले (50) प्रियोळ (71) हांगाय संख्या उणी आशिल्ली.
सद्या म्हामशें मतदारसंघांत सगल्यांत चड 46 टीबी दुयेंती उपचार घेतात. हाचे उपरांत पर्वरे 45, शिवोले 43, मडगांव 41 जाल्यार वास्को आनी दिवचल मतदारसंघांत दरेकी 40 दुयेंती टीबी खातीर उपचार घेतात.
टीबी निर्मुलन करपा खातीर भलायकी खातें विवीध उपाय करीत आसा. हे खातीर नॅट सारक्या आधुनीक चांचण्यो उपलब्ध करून दिल्यात. भलायकी खातें टीबीच्या उपचारा खातीर आधुनीक पद्दतीचो वापर करता. हाका लागून वयल्या काळांत टीबी दुयेंसांतल्यान बरे जावपाची संख्या लेगीत वाडल्या. 2021 वर्सा बरे जावपी दुयेंतींची टक्केवारी 82.41 आशिल्ली. 2021 वर्सा 1075 पैकीं 886 दुयेंती बरे जाले. 2022 वर्सा 1154 पैकीं 986 दुयेंती, 2023 वर्सा 1189 पैकीं 1047 दुयेंती बरे जाले. 2024 वर्सा 1219 पैकीं 1029 (84.41 टक्के) दुयेंती बरे जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
