भांगरभूंय | प्रतिनिधी
एका वराच्या प्रवासाक लागतात तीन वरां; प्रवाशी बेजार
भांगरभूंय । प्रतिनिधी
मुरगांवः शेनवारा कुठ्ठाळी- आगशी मजगतीं येरादारेची व्हड कोंयडी जाल्ली. तशेंच कुठ्ठाळी जंक्शन ते संत्रांत आनी कुठ्ठाळी जंक्शन ते आगशी मेरेन गाडयांची रांक लागिल्ली. दिसपट्टे येरादारेचे कोंयडेक लागून प्रवाशांचे पासियेंस काबार जाल्लें दिश्टी पडटालें.
मडगांव- पणजी मुख्य रस्त्याचेर कुठ्ठाळी- आगशी मजगतीं येरादारेची कोंयडी आतां सदांचीच जावपाक लागल्या. तरी लेगीत फाटले कांय दिसांनी ती व्हड प्रमाणांत जाता. ताका लागून एका वराच्या प्रवासाक तीन वरां लागपाक लागल्यांत.
नव्या जुवारी पुलाच्या बांदकामाक लागून येरादारीची कोंयडी जाता हें जरी खरें आसलें तरीय येरादारी पुलीस आनी येरादारी खातें हांणी ह्या प्रकारांत सुदारणा करचे खातीर कसलेच यत्न करूंक नात, असो आरोप प्रवासी करपाक लागल्यात. ह्या वाठारांत सामान्य येरादारी पुलीस आनी होमगार्डाच्या भुजाचेर जापसालदारकी दिवन वरिश्ठ अधिकारी सुसेग घेतात, अशेंच चित्र दिसता. अधिकाऱ्यांनी ह्या वाठारांत प्रत्यक्ष हाजीर रावून हे कोंयडेचेर उपाय सोदपाक जाय, पूण ताणी ते मातूय करूंक नात, अशें ह्या मार्गा वयल्यान प्रवास करपी उलयतात.
मेळिल्ले म्हायती प्रमाण आगशी बायपास रस्त्या वयल्यान विमानतळा वटेन वचपी टॅक्सी हे कोंयडेंत सांपडिल्ल्यो आसतात. त्यो तिसरी रांक करून मुखार वतात आनी ताका लागून फुडें आनीक कोंयडी डाता. हे सगळे समस्येचेर उपाय काडचे खातीर ह्या वाठारांत येरादारी पुलीस अधिकारी आनी येरादारी खात्याचे निरिक्षक तैनात करचे, अशी मागणी प्रवाशांनी केल्या. फाटल्या दिसांनी मुख्यमंत्री डॉ. प्रमोद सावंत हांणी हे स्थितीची पळोवणी केल्ली आनी हाचेर उपाय काडपाची सुचोवणीय केल्ली. पूण उपरांत त्यो सुचोवण्यो थंयच धुल्ल खायत पडल्यो. जुवारी पुला लागसार कुठ्ठाळी फेरी धक्क्या कडेन वचपी रस्तो तशेंच आगशी वटेन आगशी- गोवा वेल्हा वटेन वचपी रस्त्याचेर आशिल्लो नाको हीच येरादारी आडखळपाची मुखेल कारणां, अशें प्रवाशांक दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
