कुठ्ठाळीचे सध्याचे नुस्तेमारी जेटीची दुरुस्ती करची

भांगरभूंय | प्रतिनिधी

लोकांचो थाराव; सनबर्नाक विरोध, बायलांचे सुरक्षे खातीर पुलीस गस्त घालपाची मागणी

भांगरभूंय । प्रतिनिधी

वास्कोः कुठ्ठालेचे सध्याचे नुस्तेमारी जेटीची दुरुस्ती करची. ते जेटीचें खासगीकरण करपाक विरोध आसा, असो सूर आयतारा 25 ऑगस्टाक कुठ्ठाळेचे ग्रामसभेंत आयलो. रोमी कोंकणी लिपयेक अधिकृत भाशेचो दर्जो, बायलांचे सुरक्षे खातीर पुलीस गस्त वाडोवची, चड करून पींक फोर्सान गस्त घालची, सनबर्नाक विरोध करप अशे साबार थाराव घेतले.

रस्त्या कुशीक नुस्तें विकपी विक्रेत्यांनी सोपो दर 200 रुपया बदला 50 रुपया करचो, अशी मागणी केल्ली. पूण ती मानून घेवपाक सरपंच सानिया परेरा हांणी न्हयकार दिलो.

कुठ्ठाळीची ग्रामसभा सरपंच सानिया परेरा हांचे अध्यक्षते खाला जाली. हे ग्रामसभेंत विवीध विशयांचेर चर्चा जावन कांय म्हत्वाचे थाराव घेतले.

कुठ्ठाळेचे नुस्तेमारी जेटीची पुराय आवतिकाय जाल्या. ताका लागून नुस्तेमार भावांक तिचो वापर करपाक मेळना. ते जेटीची बेगिनात बेगीन दुरुस्ती करची, अशी मागणी ग्रामसभेंत केली. थंय कांय नुस्तेमारी बोटी बुडिल्ले अवस्थेंत आसात. त्या बोटींनी जळारांची पैदास जाता, ते खातीर त्यो उदकांतल्यो भायर काडच्यो, अशीय मागणी केली.

कुठ्ठाळेचे सध्याचे नुस्तेमारी जेटी लागसार नवी जेटी बांदपा संबंदांतलो पुराय प्रकल्प अहवाल आपणे वाचला. ते प्रमाण थंय 27 कोटी रुपया खर्च करून जेटी बांदतले. ते खातीर सुमार 17 हजार चौखण मिटर अंतरा मेरेन तशेंच चार मिटर खोल मेरेनचो चिखल काडटले. ताका लागून तिसऱ्यो, कालवां आनी नुस्तेमारी करून पोट भरप्यांचेर व्हड परिणाम जातलो.  थळाव्या नुस्तेकार भावांक ते जेटीचो कसलोच फायदो जावचो ना. हे खातीर त्या प्रकल्पाक ग्रामसभेंत लोकांनी विरोध केलो. थंयच्या रॅम्पाची आवतिकाय जाल्या. ताची दुरुस्ती करची. थंय रॅम्प नाशिल्ल्यान नुस्तेकार भावांक कांय समस्यांक फुडो करचो पडटा. ते खातीर तो दुरुस्त करून त थळाव्या लोकां खातीर दिवचो, अशी मागणी केल्ल्याची म्हायती सरपंच परेरा हांणी दिली.

बायलांचे सुरक्षे खातीर कुठ्ठाळी पंचायत वाठारांत पींक फोर्साची गस्त घालची, हे खातीर गृह खात्याक पत्र बरयतले. सध्या ह्या वाठारांत पींक फोर्साची गस्त ना. तशेंच पुलीस गस्त लेगीत वाडोवची, अशी मागणी लोकांनी केली. कांय जाण रस्त्याचे कुशीक बसून नुस्तें विकतात. तांचे कडल्यान दर दिसा 200 रुपया सोपो घेतात, जाल्यार मार्केटांतल्या विक्रेत्यां कडल्यान 50 रुपया सोपो घेतात. आमकांय 50 रुपया सोपो घेवचो, अशी मागणी त्या नुस्तें विक्रेत्यांनी केल्या. पूण ते मार्केटांत विक्री करिनात हे खातीर मार्केटांत गिरायक वचनात. तांणी मार्केटांत बसून नुस्तें विकचें, तांचे कडल्यान लेगीत 50 रुपया सोपो घेतले. सगळ्या विक्रेत्यांक एका पाख्यां पोंदा हाडपाचे आमचे यत्न आसात, अशें सरपंच परेरा हांणी सांगलें.