भांगरभूंय | प्रतिनिधी
माड म्हणल्यार तें एक झाड. पूण फाटल्या कांय दिसांनी राजकारण्यांनी ताका तण अशें म्हणिल्लें आमकां आयकूंक आयिल्लें आनी दिसाळ्यांनी आमकां वाचुंकूय मेळिल्लें. तेन्ना आमकां अशें दिशिल्लें की हे राजकारणी तकलेन सुटूंक बी नात मूं? सुटल्यात बी आसुये अशें तांचें उतर आमकां मेळ्ळें. गिन्यांनी मनीस केन्नाच माडाक तण म्हणचो ना न्हय? एक माड एका कुटुंबाक पोसता. माडा पसून आमकां खूब कितें मेळटा. पयलीं म्हणल्यार नाल्ल मेळटा. हालींच्या दिसांनी नाल्लाचो प्रेस वाडत आसा. दर एका कुटुंबाक तो गरजेन जाय. हुमण करतलो जाल्यार नाल्ल जाय. सादो रोस करतलो जाल्यार नाल्ल जाय. चटणी करतलो जाल्यार नाल्ल जाय. आमकां गोंयकारांक नाल्ला बगर जायच ना अशें म्हणलें जाल्यार तें चुकीचें थारचें ना.
माडाक लागून कितल्योशोच वस्तू आमकां मेळटात. पयले सुवातेर आडसरां, दुसरे सुवातेर नाल्ल, ताच्यो कट्ट्यो जळोवपाक उपेगी जातात. ताची सोण्णां जळोवपाक उपेगी जातात. ताच्या कात्या पसून राजू करतात. त्या राजवाचो बांयचें उदक काडपाक उपेग जाता. माडाचे वाशे काडटात ताचो उपेग घराक जाता. चुट्टाचीं विणून मल्लांय करपाक जाता. तांचो वापर खोंप शिंवपाक करूं येता.
पयलीं लांब माड आसताले. असल्या माडाचे नाल्ल काडटलो जाल्यार पाडेली जाय पडटा आनी तुमकां आमकां सगल्यांकूच खबर आसा तें म्हणल्यार हालीं तेंपार पाडेली मेळप सामकें कठीण. म्हूण हालीं तेंपार सडशे जाण मोडवे माड रोयतात. कित्याक तर ताचे वेल्यान नाल्ल वा आडसरां काडपाक चड तकालस घेवची पडना.
कल्पवृक्ष म्हणल्यार माड हाचेर एक सोबीत मराठी गीत बरयिल्लें आयकूंक मेळटा. तें गीत म्हणल्यार ‘कल्पवृक्ष कन्येसाठीं लावूनीया बाबा गेले. वैभवाने भरूनी आले यारे का हो बघायाला.’ हें गीत आयकतकच दोळ्यांतल्यान दुकां आयले बगर रावनात. चडशे लोक नव्या घराक जागो घेता आसतना, नव्या घराचे सरभोंवतणी माड रोवपाची तजवीज करतात. घराचे सरभोंवतणी माड रोयत जाल्यार घराची सोबितकायूय वाडटा हें ते बेसबरें जाणा आसतात.
गोंयांत माकडांचो वावर चड जाल्ल्यान तीं, आडसरां नाल्ल कांयच दवरिनात. आमकां नाल्ल आडसरां काडटलो जाल्यार पाडेली जाय. पूण तांकां असलें काय लागना. धांवडावपाक गेल्यार ही एक लुकसाणीची गजाल जावन आसा. हाचेर उपाय कांयच ना काय कितें? आमी आमकां जाय म्हूण माड रोयतात पूण तांचो उपेग दुसऱ्यांक जाता हें पळोवन सामकें वायट दिसता. पूण सांगतलो कोणाक हो प्रस्न उप्रासता.
माडार जेन्ना चड नाल्ल लागतात तें पळोवन जीव धादोस जाता. ते आमकां मेळूंक जाय आशिल्ले अशें दिसता. पूण पाडेली मेळ म्हणसर थंय नाल्लूच उरनात. ताका लागून जावये गोंयांत नाल्लाचें उत्पन्न उणें जालां आनी तांचो प्रेस वाडला. हांगा चडश्या लोकांनी नवे माड रोवप बंद केलां. ताचे वरवीं आतां लोक माडयो रोयतात, आनी ताचे पसून तांका सुपाऱ्यो मेळटात. सुपाऱ्या पसून चड फायदो आसा. अशें तांचें म्हणणें आसा. तांचो दरूय वाडटा. माड हो खऱ्यांनीच दर एकल्या कुटुंबाचो जावन आसा सांगाती. पूण नाल्ल काडपाक वेळार पाडेली मेळना आनी पाडेली मेळटा तेन्ना माडार नाल्लूच आसनात. माकड खावन उडयता. ही जावन आसा समकीं निरशेणी हाडपाची गजाल न्हय? पूण एक माड एका कुटुंबाक पोसता म्हूण तो जावन आसा कुटुंबाचो सांगाती, वा सोबती अशें म्हणल्यार चूक जावची ना.
गुरुदास नाडकर्णी
9657573975.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
