भांगरभूंय | प्रतिनिधी
नवी दिल्ली, खबरां संस्था ः आदल्या काळांत गोडेंमूत चड करून फकत मध्यम पिरायेच्या लोकांक जातालो. आतां गोडेंमूत भुरगीं आनी तरणाटे हांचे मदीं जाता. भारतांत गोडेंमूत दुयेंतींची संख्या नेटान वाडत आसतना एक धक्को दिवपी गजाल उजवाडाक आयल्या. संशोधनाच्या मतान कुटुंबांत गोडेंमूत जावपाचो इतिहास आसल्यार 40% वांगड्यांक पिरायेच्या 35 वर्सां पसून गोडेंमूत जावपाचो धोको आसता.
देशभरांतल्या 18 ते 80 वर्सां पिरायेच्या 2,25,955 लोकां कडल्यान एकठांय केल्ल्या डेटाचेर केल्ल्या संशोधनांतल्यान ही म्हायती उक्ती जाल्या.
डॉ. राकेश एम. पारीख हांच्या फुडारपणा खाला 16 संस्थांनी केल्ल्या संशोधनाचे परिणाम विकसनशील देशांतल्या गोंडेमूताच्या इंटरनॅशनल जर्नलांत उजवाडाक आयल्यात. अहवाला प्रमाण नमुन्याच्या आकाराचे नदरेन देशांत आतां मेरेन केल्ले हे सगळ्यांत व्हडले सर्वेक्षण. तशेंच उण्या धोक्याच्या कुटुंबांतल्या बायलांक गोडेंमूत जावपाचो धोको चड आसता अशी अजापाची गजाल ह्या संशोधनांतल्यान उक्ती जाल्या. म्हळ्यार गोडेंमूत जाल्ल्याचो इतिहास नाशिल्ल्या कुटुंबांत दादल्यांपरस बायलांक गोडेंमूत जावपाची चड शक्यताय आशिल्ली. अहवाला प्रमाण 35 वर्सां सकयल्या पिरायेच्या गटांत 11.5% दादले आनी 12.1% बायलांक गोडेंमूत जावपाचो धोको आशिल्लो. तशेंच ह्या अभ्यासांत आस्पाव केल्ल्या 84.8% लोकांक गोडेंमूत पयलींच आशिल्लें. त्याच वेळार 9.5% नवें दुयेंती सांपडले.
तरणाट्यां मदीं आळशी जिणे पद्दत आनी लठ्ठपणा हें ह्या दुयेंसाचे सगळ्यांत म्हत्वाचें कारण. आहारांत प्रथिनां बदला कार्बोहायड्रेट भरपूर आशिल्ल्यानय ही समस्या आनीक वाडली. तज्ञांच्या मतान दाळ आनी दुदाचे पदार्थ हांचे बदला गंव, तांदूळ, मैदा हांचो चड वापर जाता.
भारतांतल्या 11% लोकांक गोडेंमूत
आयडीएफ अॅटलासाच्या म्हणण्या प्रमाण 2021 वर्सा संवसारांतल्या गोडेंमूत दुयेंतींतले 10% लोक भारतांत आशिल्ले. ते प्रमाण 2045 मेरेन देशांतले 12.49 कोटी लोकांक गोडेंमूत जावं येता असो अदमास आसा. त्याच वेळार आयसीएमआर इंडियाबीच्या संशोधनांत भारतांतल्या 11.4% लोकसंख्येचेर ताचो परिणाम जातलो असो अदमास काडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
