भांगरभूंय | प्रतिनिधी
केंद्र सरकाराची नवीं मार्गदर्शक तत्वां
नवी दिल्ली, खबरां संस्था ः भलायकी मंत्रालयान 24 दोतोरांच्या पंगडाचे शिफारशीचेर आदारून गंभीर दुयेंतींक आयसीयूंत दाखल करपा खातीर नवीं मार्गदर्शक तत्वां जारी केल्यांत. ते प्रमाण कुटुंबांतल्या वांगड्यांची संमती बगर हॉस्पिटलांतल्या दुयेंतीक आयसीयूंत दाखल करपाक मेळचे ना. तशेंच दुयेंतीचेर उपचार जायनात आनी ताची स्थिती सुदारना जाल्यार हॉस्पिटल ताका मुद्दाम आयसीयूंत दवरूंक शकना.
मार्गदर्शक तत्वां प्रमाण दुयेंतीक हेमोडायनामिक अस्थीरता, ऑक्सिजनाची गरज, स्वास घेवपाक त्रास जाता, काळजाचो आताक आयला, रगताची उलटी जाता, अवयवांक आदार जाय पडल्यार, वैजकी स्थिती वा दुयेंस गंभीर आसल्यार तांकां आयसीयूंत दाखल करुंक शकता.
ते भायर बेशुद्ध अवस्थेत श्वसनाची गरज आशिल्ल्या दुयेंतींक, गंभीर दुयेंस आसल्यार निरिक्षणाची गरज आशिल्ल्या दुयेंतींक, शस्त्रक्रिया उपरांत भलायकी इबाडपाची भिरांत आशिल्ल्या, इंट्राऑपरेटिव्ह गुंतागुंत आशिल्ल्या दुयेंतींक आयसीयूंत दाखल करूं येतात.
रगतदाब, नाडी दर, श्वसन दर, श्वसनाची पद्दत, काळजाचो वेग, ऑक्सिजन संपृक्तता, मुताचें आउटपुट आनी आयसीयू खाटींतली न्यूरोलॉजिकल स्थिती सयत हेर मापदंड तपासचे. ते भायर दुयेंतींची स्थिती सामान्य जाले उपरांत वा बेसलायन स्थितींत परत आयले उपरांत हॉस्पिटलान तांका आयसीयूंतल्यान सोडचे अशेंय मार्गदर्शक तत्वांनी म्हणलां.
आयसीयू मार्गदर्शक तत्वां तयार करपी पॅनेलाचो भाग आशिल्लो डॉ. आर के मणी हांणी सांगले आयसीयू ही मर्यादीत साधनसुविधा. ज्या लोकांक ताची चड गरज आसा तांकां आयसीयूंत प्रवेश मेळचो हे खातीर मार्गदर्शक तत्वां तयार करपाचो हेतू आसा. अहवाला प्रमाण भारतांत सुमार एक लाख आयसीयू बेड आसात, तातूंतली चडशीं खाजगी हॉस्पिटलांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
