भांगरभूंय | प्रतिनिधी
वेळ्ळी ग्रामसभेंत मागणी, पूण पंचायतीची बचावात्मक भुमिका
भांगरभूंय । प्रतिनिधी
मडगांवः कुटबण जेटीचेर कोमुनिदादीचे जमनीर 40 ते 50 बेकायदो बांदकामां आसासत. मुख्यमंत्र्याचे भेटी वेळार ती काडपाक सांगिल्लीं. होच मुद्दो वेळ्ळी ग्रामसभेंत चर्चेक आयलो. त्या बांदकामांचेर कारवाय करची. थंय कायदेशीर बांदकामां करून थळाव्या लोकांक ताचो लाव दिवपाची मागणी केली. पंचायती वतीन मात हे संबंदांत बचावात्मक भुमिका घेतली.
वेळ्ळी पंचायती ग्रामसभा आयतारा सकाळीं पंचायतीच्या सभाघरांत जाली. ह्या वेळार विनय तारी हांणी कुटबण जेटीर बेकोयदो बांदिल्ल्या बांदकामांचो प्रस्न मांडलो. हीं बांदकामां करून दुसऱ्यांक भाड्याक दिल्यांत. थंय सरकारान वा नुस्तेमारी खात्यान कायदेशीर बांदकामां करून तीं थळाव्या लोकांक चलोवपाक दिवचीं, अशी लोकांनी मागणी केली.
कुटबण जेटीर 40 ते 50 बेकायदो बांदकामां आसात. तातूंतल्यान म्हयन्याक 5 ते 40 हजार रुपया मेरेन भाडें घेतात. गांवांतल्या लोकांक ताचो कसलोच फायदो ना. फाटल्या 30 वर्सां सावन तीं बांदकामां आसात. ती सरभोंवतणच्याच लोकांचीं अशें सांगतात. तांकां घर नंबर दिल्यात तशेंच त्या बांदकामांत वेपार करचे खातीर परवाने दिल्यात, अशें सरपंचान स्पश्ट केलें.
कुटबण जेटीर बेकायदो बांदिल्ल्या बांदकामांतल्यान थळाव्या लोकांक कसलोच फायदो जायना. तीं भाड्यान दिवन कांय जाण लाखांनी रुपया जोडटात. ताची नुस्तेमारी खात्या वतीन तशेंच राज्य सरकारा वतीन चवकशी करून कारवाय करची, अशी मागणी आदले सरपंच सावियो डिसिल्वा हांणी केली. बेतलांत वचपी मुख्य जिल्हो मार्गाक (एमडीएर रोड) वेळ्ळी ग्रामसभेंत विरोध केलो. येरादारी संचालनालया कडल्यान गुगल मॅपा वरवीं हो मार्ग दाखयला. मात 25 मिटर रुंदायेच्या ह्या मार्गाक लागून गांवांतल्या लोकांक त्रास सोंसचो पडटलो. ह्या मार्गार एक प्रकल्प लेगीत प्रस्तावीत आसा. आपूम सरपंच आसतना नगर नियोजन खात्या कडल्यान परवानगी दिल्लो प्रस्ताव ग्रामसभेन भायर मारिल्लो. आतां परतून तो प्रकल्प हाडपाचे यत्न चल्ल्यात अशें कळ्ळां. म्हायतीच्या अधिकारांत सगळी म्हायती घेवन भौशीक करतलों, अशें डिसिल्वा हांणी सांगलें.
सरपंच वीणा कार्दोज हांणी सांगलें, पंचायत वाठारांत हेडग्या गोरवांचो प्रस्न निर्माण जाला. रस्त्याचेर बसपी गोरवांक लागून अपघाताची शक्यताय आसा. हे संबंदांत गोरवां सांबाळ खात्याक पत्र बरोवन तांचे कडल्यान सल्लो घेतले आनी उपाय येवजण करतले. वेळ्ळी गांवांतल्यान प्रस्तावीत मुखेल जिल्हो मार्गाचेर चर्चा जाली. गुगल मॅपाचेर हो मार्ग दाखयतात. आतां त्या मार्गाक लोकांचो विरोध आशिल्ल्यान तो मार्ग रद्द करपा संबंदांत सरकारा कडेन पत्र वेव्हार करतले. ग्रामसभेंत कुटवण जेटी वयल्या बांदकामांक वेपार परवानो कसो दिलो, हाचेर प्रस्न उपस्थीत केले. त्या बांदकामां घर नंबर दिल्ल्यान ते प्रमाण पंचायती कडल्यान वेपार परवाने दिले, अशी म्हायती सरपंच वीणा कार्दोज हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
