भांगरभूंय | प्रतिनिधी
मडगांवः कुटबण जेटीचेर पिवपाचें उदक आनी शौचालय सुविधा उपलब्ध आसा आनी नितळसाण कामूय सुरू आसा. पूण खंयच्याय कामगाराक साथीच्या दुयेंसाचीं लक्षणां दिसल्यार ती लिपोवन दवरनासतना भलायकी खात्याच्या अधिकाऱ्यांक बेगोबेग कळोवप गरजेचें अशें वेळ्ळीचे आमदार क्रूझ सिल्वा हांणी सांगलें.
दोन दीस आदीं कुटबणांतल्या एका कामगाराक मोडशी जाल्ल्यान ताका दक्षीण गोंय जिल्हो हॉस्पिटलांत दाखल केल्लो. उपचारा उपरांत डिस्चार्ज जाले उपरांत दुसऱ्याच दिसा ताका मरण आयलें. पोस्टमॉर्टम केलां पूण अजून कारण स्पश्ट जावंक ना. फुडले तपासणे खातीर ताचो व्हिसेरा दवरलां. हाचे आदींय एका कामगाराक जेवले उपरांत मरण येवपाची घडणूक घडिल्ली.
भलायकी खात्याचो पंगड नेमान कुटबण जेटींत येवपी कामगारांची भलायकी तपासता आनी गरजेचे उपचार करतात. जेटीचेर नितळसाण दवरपाचेर लक्ष दितात आनी कामगारांनी पिवपाचें उदक आनी शौचालय सुविधा योग्य रितीन वापरपाची गरज आसा अशें आमदार सिल्वा हांणी सांगलें.
फाटल्या कांय वर्सांत ह्या वाठारांत कॉलेरा दुयेंती वाडल्यात. पयलीं जेटीचेर डेंग्यूचे दुयेंती चड मेळटाले. पूण आतां कॉलेराचेय दुयेंती मेळपाक लागल्यात. हाचे फाटली कारणां सोदून काडून गरजेचीं पावलां उबारप गरजेचें आसा अशें आमदार सिल्वा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
