भांगरभूंय | प्रतिनिधी
१६६५ कामगारांची केली भलायकी तपासणी
मडगांव : कुटबण जेटीचेर येवपी बिगर गोंयकार कामगारांची बाळ्ळी भलायकी केंद्राच्या कर्मचार्यांनी भलायकी तपासणी केली. आतां मेरेन १६६५ कामगारांची भलायकी तपासणी केल्या. ह्यान पयलीं स कॉलराचे दुयेंती मेळिल्ले. आतां हो आंकडो १३ चेर पावला. संबंदीत खात्यां कडल्यान गरजेचे सगले उपाय केल्यात.
कुटबण जेटीचेर भलायकी आनी नितळसाणेच्यो समस्या निर्माण जातात. हाचेर सगल्या भागधारकांची बसका आयोजीत करची. जेटीचे पळोवणे सयत ह्यान पयलीं सुचयिल्ल्या उपायांचे अंमलबजावणेचेर चर्चा जावची, अशी मागणी गोवा कॅना कडल्यान उपजिल्लोधिकार्यां कडेन केल्ली. ते प्रमाण बिरेस्तारा उपजिल्लोधिकारी लक्ष्मीकांत देसाय, मामलेदार, वेळ्ळी सरपंच, कुटबण जेटीचेर दोनूय नुस्तेंमारी संघटना, भलायकी विभाग, नुस्तें अधिकारी, गोवा कॅन आनी संबंदीत भागधारकांची जोड बसका जाली. .
नुस्तेंमारी हंगामा खातीर जेटीचेर दाखल जाल्ल्या कामगारांचे भलायके कडेन संबंदीत जायते प्रस्न निर्माण जाल्यात. कुटबण जेटी आनी वाठारांतल्या लोकांच्या भलायकी आनी नितळसाणेच्या समस्यांचेर उपाय करपाची गरज आसा. फाटल्या वर्सा, सप्टेंबर २०२४त कॉलराची साथ पातळिल्ली. उपजिल्लोधिकार्यांनी प्रत्यक्ष पळोवणी आनी बसकां वरवीं नुस्त्या वेवसाय विभागाक कुटबण जेटी आनी वाठारांतली नितळसाण राखपाक गरजेचीं पावलां उबारपाचे निर्देश दिल्ले. कुटबण जेटीचेर भलायकी आनी नितळसाणेच्यो समस्या सोडोवपा खातीर नुस्तें वेवसाय संचालनालयान केल्ल्या उपायांची म्हायती दिली. ह्या वेळार भलायकी अधिकार्यांनी आतां मेरेन १६६५ कामगारांची भलायकी तपासणी केल्ल्याची म्हायती दिली. हे तपासणेक लागून आतां मेरेन १३ कॉलराचे दुयेंती सांपडिल्ल्याची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
