भांगरभूंय | प्रतिनिधी
सर्वोच्च न्यायालयानूय याचिका भायरायली; एनजीपीडीएची कारवाय
म्हापशें: खडपावाडो-कुचेली म्हापश्यां सरकारान सगल्या धर्माच्या लोकां खातीर मसंडभूंय संपादीत केल्ले सुवातेंत अतिक्रमण करून बेकायदो रितीन बांदिल्लीं उरिल्लीं तिनूय घरां उत्तर गोंय नियोजन आनी विकास प्राधिकरणान मोडून उडयलीं.
संबंदितांक उच्च न्यायालयांत स्वता घर मोडून उडोवपाचे निर्देश दिल्ले. तरी लेगीत सिखा झा, गिरीश नायक आनी तुळशीराम मुन्नीलाल लोदी ह्या तिगांनी सर्वोच्च न्यायालयांत धांव घेतिल्ली. पूण संबंदितांक न्यायालया कडल्यान थाकाय मेळ्ळी ना आनी तांची याचिका बिरेस्तार 9 जानेवारी दिसा भायरायली.
ही याचिका भायरायले उपरांत उत्तर गोंय प्राधिकरणान संबंदितांक घरां रितीं करपा खातीर काल मेरेन मुजत दिल्ली. ते प्रमाण ह्या घर धनयांनी घरांतल्यो सगल्यो वस्तू हेर कडेन हालयल्यो. आयज (शुक्रारा) सकाळीं हीं घरां पुलीस बंदोबस्तांत मोडून उडयलीं. ह्या वेळार मामलेदार अनंत मळीक, एनजीपीडीएचे अधिकारी, भौशीक बांदकाम खात्याचे अधिकारी हाजीर आशिल्ले.
मजगतीं, फाटल्या 2 जानेवारी दिसा राजेश झा हांचे घर मातयेभरवण केल्लें. ताचे पयलीं 12 नोव्हेंबर दिसा 36 पैकीं 32 बेकायदो घरां मोडून उडयिल्लीं.
मजगतीं, म्हापशें शार पीटी शीट क्रमांक 1, चलता क्रमांक 10/3 आनी पीटी शीट क्रमांक 2, चलता क्रमांक 11/1 ह्या जमनीतलीं सुमार 30 हजार चौ. मि. सुवातेर अतिक्रमण करुन वट्ट 36 घरां बेकायदो पद्दतीन बांदिल्लीं. ही जमीन सरकारान सगल्या धर्माच्या लोकां खातीर मसंडभुंयेक लागून संपादीत केल्ली.
मजगतीं, ह्या सरकारी जमनीचे भुखंड करून संबंदीत घर धनयां सयत सरकारी फटवणूक करून वट्ट 38.49 लाख रुपया उखळिल्ल्याच्या आरोपा खाला म्हापशें पुलिसांनी अनवळख्यां आड गुन्यांव नोंद केल्लो. ह्या गुन्यांवा खाला पुलिसांनी रमेश राव, शकील शेख आनी रवी चव्हाण ह्या तिगांक अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
