भांगरभूंय | प्रतिनिधी
पडझडींत घरांचें, वीज खात्याचें लुकसाण
भांगरभूंय । प्रतिनिधी
म्हापशें: उटंगाराच्या पावसाक लागून सोमारा म्हापशें शारांतल्या न्हंयेदेगेर आशिल्ल्या घरांनी उदक घुसून नासाडी जाली. कांय कडेन पडझड जाली.
कुचेली सडयांत न्हंयेंत झाडां वाडिल्ल्यान उदकाक व्हावून वचपाक आडखळ निर्माण जाल्या. ताका लागून गुरुदास मिरजकार आनी रमेश वायंगणकार हांच्या घरांत उदक घुसून नासाडी जाली. नगराध्यक्ष डॉ. नुतन बिचोलकार, नगरसेवक आनंद भाईडकार, सडयेची सरपंच दीपा पेडणेंकार हांणी शिंपणावळ खात्याचे सहाय्यक अभियंते सतीश पास्ते आनी सांगाती अधिकाऱ्यां वांगडा घडणुकेचे सुवातेर भेट दिवन पळोवणी केली.
न्हंयेच्या झोताक आडखळ आनी हुंवारा सारके स्थितीक कारण थारिल्लीं झाडां मारचे खातीर रान खात्या कडेन फाटपुरवण करची, अशी सुचोवणी नगराध्यक्ष बिचोलकार आनी सडयेची सरपंच पेडणेंकार हांणी शिंपणावळ खात्याच्या अधिकाऱ्यांक दिली.
म्हापशें न्हंयेदेगेर रावपी सुहास च्यारी, अशोक मावळणकार, वामन परब आनी कृष्णा भिवशेट हांच्या घरांत उदक घुसलें आनी नासाडी जाली. तशेंच शेट्येवाड्या वयले शरद पिरणकार हांच्या घरांत घुसून ताचें लुकसाण जालें. म्हापशेंचे तलाठी सुशांत फातर्पेंकार हांणी घडणुकेचे सुवातेर भेट दिवन पळोवणी केली.
मजगतीं, विठ्ठलवाडी म्हापशेंच्या निलेश घाटवळ हांच्या घराचो फुडलो भाग कांय प्रमाणांत कोसळ्ळो. ताका लागून तांचे हजारांनी रुपयांचें लुकसाण जालें. गिरी आयिल्ल्या हुंवाराच्या उदकांत एक मोटार व्हांवून गेली. वांगड्यांनी मोटारींतल्या लोकांक वाटायले, तशेंच शेतांतल्या झाडाक आडकून उरिल्ली मोटार ओडून भायर काडली. पावसाच्या सांचून उरिल्ल्या उदकाक लागून गिरी, बस्तोडें आनी कुचेली वाठारांत हुंवाराचें स्वरूप आयलां.
शांतीनगर खोर्ले दोंगुल्ली वयलो व्हड फातर कोसळून मनोहर गडेकार हाच्या घराचें तशेंच राखणे वण्टीचें लुकसाण जालां. खैराट कामुर्लीचे नेसी फर्नांडीस आनी आल्बिनो फर्नांडीस हांच्या घराचेर धाड पडून सुमार लाखभराचें लुकसाण जालें. तशेंच कामुर्लीचे अभय पेडणेंकार हांच्या घराचेर झाड पडून तांचें 50 हजार रुपयांचें लुकसाण जालें. साळगांवां एका घराचेर माड पडलो. तशेंच खोर्ली, गिरी, आसगांव, धुळेर, पर्वरी ह्या वाठारांतल्या कांय रस्त्यांचेर आनी वीज सरयांचेर झाडां पडलीं. म्हापशें, पर्वरी आनी पिळर्ण उजो पालोवपी दळाच्या जवानांनी हीं झाडां कापून कुशीक काडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
