भांगरभूंय | प्रतिनिधी
म्हापशेंः कुचेली – म्हापशें दत्तप्रसाद कॉलनींतल्या वॉटर ट्रीटमेंट प्लांटा लागसारच्या तिळारी कानलांत म्हापशेंचो ओंकार प्रभुदेसाय (२६) हो तरणाटो बुडलो.
मेळिल्ले म्हायती प्रमाण, ओंकार आनी ताचो इश्ट कानलांत न्हावपाक आयिल्ले. ओंकारान पेंवपा खातीर कपडे काडून देगेर दवरले आनी उदकांत उडी मारली. बरोच तेंप तो उदकातल्यान वयर येवंक ना हें लक्षात येतकच ताच्या इश्टाक कितें तरी गडबड आसा असो दुबाव आयलो. ताणें 100 नंबराचेर संपर्क करून पुलिसांक हे विशीं म्हायती दिली. मजगतीं, पुलिसांनी म्हापशें उजो पालोवपी दळाक म्हायती दिली.
उपरांत उजो पालोवपी दळ आनी पुलीस घडणूक सुवातेर पावलें. तांणी ओंकाराची कूड उदकांतल्यान भायर काडली. उदकाचो अदमास येवंक नाशिल्ल्यान ताका उदकांत बुडून मरण आयिल्ले आसूं येता असो अदमास पुलिसांनी उक्तायलो. पुलिसांनी पंचनामो करून कूड पोस्टमॉटमा खातीर जीएमसींत धाडल्या.
ह्या प्रकरणांत म्हापशें पुलीस स्टेशनाचे उपनिरिक्षक अभिजीत नायक, उत्क्रांतराव देसाय, हवालदार आशिर्वाद नायक, म्हापशें उजो पालोवपी दळाचे उपअधिकारी प्रकाश कन्नायक आनी ताच्या वांगड्यांनी ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
