भांगरभूंय | प्रतिनिधी
म्हापशें, प्रतिनिधी ः कुचेली – म्हापशें रस्त्याच्या देगेच्या राखणे वण्टीक स्कुटरीचो धपको बसून जाल्ल्या स्वयं अपघातांत जखमी जाल्लो जाविटो घडामुडी (28, सडये, शिवोले) हाका उपचारा वेळार मरण आयलें.
हो अपघात 3 फेब्रुवारीक रातच्या 11.30 वरांचेर जाल्लो. जाविटो हो म्हापशें सावन कुचेली तिन माड मार्गान स्कुटरीवेल्यान सडये घरा वतालो. तेन्ना कुचेलीच्या सरकारी शाळे मुखार आशिल्ल्या चडटेचेर स्कुटरीवेलो ताबो गेलो आनी राखणे वण्टीक स्कुटरीचो धपको बसलो.
ह्या अपघातांत जाविटो घडामुडीची तकली फातराक आपटली आनी बेशुद्ध जावन गंभीर जखमी जालो. अपघाताची म्हायती मेळ्ळ्या उपरांत ताका 108 एम्ब्युलन्सांतल्यान म्हापशें जिल्लो हॉस्पिटलांत व्हेलो आनी उपरांत फुडल्या उपचारा खातीर जीएमसींत व्हेलो. थंय उपचार चालू आसतना बुधवारा 12 तारखेक सकाळीं ताका मरण आयलें. बुधवारा सांजवेळा थळावे मसणभुंयेंत ताचेर निमाणे संस्कार जाले.
अपघाताचो पंचनामो म्हापशें पुलीस उपनिरिक्षक पंढरी चोपडेकार आनी हवालदार प्रीतम दाभोळकार हांणी केलो. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
